ભરૂચ : યુદ્ધની સ્થિતિને લઈને FGSCDAનું રાજ્યભરના કેમિસ્ટ-ડ્રગિસ્ટ્સને જરૂરી દવાઓનો જથ્થો સંગ્રહ કરવા સૂચન...

• ભારત-પાકિસ્તાન વચ્ચે સંભવિત યુદ્ધની પરિસ્થિતિ સર્જાય

• યુદ્ધના પગલે સરકારે તાબડતોબ પગલાં ભરવાનું શરૂ કર્યું

• ફેડરેશન ઓફ ગુજરાત સ્ટેટ કેમિસ્ટ-ડ્રગિસ્ટ્સ એસો.નો નિર્ણય

• રાજ્યમાં દવા વેપારીઓને જરૂરી સૂચનાઓ આપવામાં આવી

• જરૂરી દવાઓનો જથ્થો સંગ્રહ કરવા અગત્યની સૂચના અપાય

ભારત-પાકિસ્તાન વચ્ચેની સંભવિત યુદ્ધની પરિસ્થિતિને લઈને રાજ્ય સરકારે પણ તાબડતોબ પગલાં ભરવાનું શરૂ કરી દીધું છે, ત્યારે ફેડરેશન ઓફ ગુજરાત સ્ટેટ કેમિસ્ટ એન્ડ ડ્રગિસ્ટ્સ એસોસિએશન દ્વારા ભરૂચ સહિત રાજ્યભરના દવા વેપારીઓને જરૂરી દવાનો જથ્થો સંગ્રહ કરવા અગત્યની સૂચના આપવામાં આવી છે.

ભારત અને પાકિસ્તાન વચ્ચે વધતા તણાવના મામલે ફેડરેશન ઓફ ગુજરાત સ્ટેટ કેમિસ્ટ એન્ડ ડ્રગિસ્ટ્સ એસોસિયેશન દ્વારા રાજ્યભરના દવા વેપારીઓને અગત્યની સૂચનાઓ આપવામાં આવી છે. દેશની તમામ તબીબી અને આરોગ્યસંબંધિત સેવાઓ સતત ચાલુ રહે તે માટે અને અસાધારણ પરિસ્થિતિઓમાં દવાનો ખાટો ન સર્જાય, તે હેતુથી રિટેલ અને હોલસેલ લેવલના કેમિસ્ટોને વધારાનો દવાનો જથ્થો સંગ્રહ કરવા માટે સૂચવવામાં આવ્યું છે.

ફેડરેશન દ્વારા સ્પષ્ટ સૂચના અપાઈ છે કે, દરેક જિલ્લામાં રિટેલ લેવલના દવા વેપારીઓએ ઓછામાં ઓછો એકથી બે મહિના માટેનો વધારાનો સ્ટોક રાખવો જોઈએ, જ્યારે હોલસેલ વેપારીઓએ 2 મહિના કરતાં વધુ સમયનો સ્ટોક જાળવી રાખવો જરૂરી છે. આ સૂચના ચેતવણીના ભાગરૂપે આપવામાં આવી છે, અને સ્થિતિ વધુ ગંભીર બને, તે પૂર્વે જરૂરિયાત મુજબ દવાનો સ્ટોક રાખવો જરૂરી છે. આ અનુસંધાને ભરૂચ મેડિકલ એસોસિએશન દ્વારા પણ તાત્કાલિક કામગીરી શરૂ કરવામાં આવી છે.

ભરૂચ અને નર્મદા જિલ્લાના કેમિસ્ટ એસોસિએશનના તમામ સભ્યોને સંઘ તરફથી મળેલા માર્ગદર્શન અનુસાર, ભરૂચના પ્રમુખ ભરત શાહે જણાવ્યું હતું કે, ભરૂચ અને નર્મદા જીલ્લાના અંદાજીત 1 હજાર જેટલા મેડિકલ દુકાન ચલાવતા અને હોલસેલ વેપારીઓને સૂચના આપવામાં આવી છે.

એટલું જ નહીં, લોકોને કોઈપણ જાતની તકલીફ ન થાય તે માટે દવાના મુખ્ય વિતરણ કેન્દ્રો સાથે પણ સંપર્કમાં રહેવામાં આવશે. જેથી કોઈપણ આપાતકાલીન પરિસ્થિતિમાં દર્દીઓને સમયસર સારવાર મળી શકે તેવું આયોજન કરવામાં આવ્યું છે.