ગુજરાત સરકાર અને અમેરિકન ચીપ મેકર માઇક્રોન ટેક્નોલોજી વચ્ચે ઐતિહાસિક MoU-સમજૂતિ કરાર સંપન્ન કરવામાં આવ્યા છે
ગુજરાત સરકાર અને સેમિકન્ડક્ટર ચિપ તૈયાર કરતી અમેરિકન જાયન્ટ કંપની માઇક્રોન વચ્ચે બુધવારે સાણંદમાં નવા પ્લાન્ટ માટેના એમઓયુ થયાં છે. આ એમઓયુ હેઠળ માઇક્રોન 22,516 કરોડના ખર્ચે તૈયાર થનારો ચિપ મેન્યુફેક્ચરિંગ પ્લાન્ટ સાણંદમાં સ્થાપશે. આ પ્લાન્ટ માટેનું બાંધકામ આ વર્ષે જ શરૂ થશે અને તે આવતાં વર્ષે કાર્યરત થઇ જશે. આ પહેલા તબક્કામાં કંપની ગુજરાતમાં 5 હજાર નોકરીઓનું સર્જન કરશે તેવો દાવો કરાયો છે. તે પછી આવનારાં 5 વર્ષમાં બીજો તબક્કો પૂર્ણ થતાં કુલ 20 હજાર નોકરીઓ ઊભી થશે.વડાપ્રધાન નરેન્દ્ર મોદીની અમેરિકા મુલાકાતની ફલશ્રુતિરૂપે આ પ્લાન્ટ ગુજરાતમાં સ્થપાઇ રહ્યો છે.રાજ્ય સરકારે ગયા વર્ષે સપ્ટેમ્બર મહિનામાં પાંચ વર્ષ માટે ગુજરાત સેમિકન્ડક્ટર પોલિસી-2022-27 જાહેર કરી છે. સેમિકન્ડક્ટર ક્ષેત્રના ઉદ્યોગોને ગુજરાતમાં આકર્ષવા અને જરૂરી તમામ સહકાર આપવાના હેતુથી રાજ્ય સરકારે અલાયદી સંસ્થા ‘ગુજરાત સ્ટેટ ઇલેક્ટ્રોનિક મિશન (GSEM) ની સ્થાપના કરી છે. આ જાહેરાત થયા બાદ એક વર્ષથી પણ ઓછા ગાળામાં આ પ્લાન્ટ રાજ્યમાં આવ્યો છે. મુખ્યમંત્રી ભૂપેન્દ્ર પટેલ અને ભારત સરકારના ઇન્ફર્મેશન ટેક્નોલોજી મંત્રી અશ્વિની વૈષ્ણવની ઉપસ્થિતિમાં આ MoU પર ગુજરાત સરકારના સાયન્સ ટેક્નોલોજી સચિવ વિજય નહેરા અને માઇક્રોનના સિનિયર વાઇસ પ્રેસિડેન્ટ ગુરુશરણ સિંઘે હસ્તાક્ષર કર્યા હતા.