ગીર સોમનાથ : માતા સાથે અનૈતિક સંબંધના વહેમમાં દીકરાએ કર્યું આધેડ પર ફાયરિંગ, આરોપી હરીયાણાથી ઝડપાયો...

ગીર સોમનાથ જિલ્લાના આંબલીયાળા ગામે આધેડ પર ફાયરીંગ કરી નાસી ગયેલ શખ્સને ક્રાઇમ બ્રાન્ચે હરીયાણાથી ઝડપી કાયદેસરની કાર્યવાહી હાથ ધરી છે. ગીર સોમનાથ જિલ્લાના તાતીવેલાથી આંબલીયાળા જતા રસ્તા પર નગા બામણીયા નામના આધેડ પર એક ઇસમ ફાયરીંગ કરી નાસી ગયો હતો.

આધેડને જીવલેણ ઇજા થતા વેરાવળની સરકારી હોસ્પીટલથી વધુ સારવાર અર્થે રાજકોટ ખસેડવામાં આવ્યો હતો. જોકે, ધોળા દિવસે ફાયરિંગ કરીને હાફ મર્ડર કરનાર આરોપીને શોધવા ક્રાઇમ બ્રાન્ચ, એસઓજી અને સ્થાનિક પોલીસ દ્વારા ટીમો બનાવી નેત્રમ CCTV ફૂટેજની તપાસ શરૂ કરી હતી, ત્યારે નેત્રમ CCTV ટીમ દ્વારા ફાયરીંગ કરી નાસી જનાર ઇસમની બાઇકનો નંબર વેરીફાઇ થયો હતો. આ સાથે જ આરોપી દિલ્હીથી હરીયાણા અને ત્યારબાદ ફરીદાબાદ તરફ નાસી ગયો હતો. જેથી ક્રાઇમ બ્રાન્ચની ટીમ તાત્કાલિક તપાસ માટે હરીયાણા થઈ ફરીદાબાદ પહોચી હતી, જ્યાં ફાયરીંગ કરનાર આરોપી મૂળ પોરબંદરના સુખદેવ ઓડેદરાની ધરપકડ કરવામાં આવી હતી. આરોપીની પુછપરછમાં હત્યાના પ્રયાસનું કારણ ફરીયાદી સાથે પોતાની માતા સંપર્કમાં હોય અને જેના કારણે ઘરમાં અવાર-નવાર ઉગ્ર વાતાવરણ સર્જાતું હતું, ત્યારે આ બાબતથી કંટાળી જઇ આરોપીએ ફરીયાદીને મારવાનું નક્કી કરી ફરીદાબાદથી દેશી બનાવટના હથિયાર સાથે ફરીયાદીનું ઢીમ ઢાળી દેવાનો પ્રયાસ કર્યો હતો.