કચ્છ : ભારતના ઉપરાષ્ટ્રપતિ જગદીપ ધનખડનું આગમન, સફેદ રણ અને ધોળાવીરાની લેશે મુલાકાત

ભારતના ઉપરાષ્ટ્રપતિ જગદીપ ધનખડનું કચ્છ જિલ્લાના ભુજ એરફોર્સ સ્ટેશન ખાતે આગમન થતા ઉષ્માભર્યું સ્વાગત કરવામાં આવ્યું હતું. દેશના ઉપરાષ્ટ્રપતિ જગદીપ ધનખડ સાથે લેડી વાઈસ પ્રેસિડેન્ટ સુદેશ ધનખડ પણ ગુજરાતના પ્રવાસે પધાર્યા છે, ત્યારે કચ્છ જિલ્લાના ભુજ એરફોર્સ સ્ટેશન ખાતે મહાનુભાવોનું આગમન થતા પ્રોટોકોલ મંત્રી જગદીશ વિશ્વકર્માએ ઉષ્માભર્યું સ્વાગત કર્યું હતું.

આ સ્વાગત પ્રસંગે કચ્છ મોરબી સાંસદ વિનોદ ચાવડા, ગ્રુપ કેપ્ટન એરફોર્સ સ્ટેશન એસ.કે.સિંઘ, ભુજ નગરપાલિકા પ્રમુખ ઘનશ્યામ ઠક્કર, જિલ્લા વિકાસ અધિકારી ભવ્ય વર્મા, પૂર્વ કચ્છ પોલીસ અધિક્ષક મહેન્દ્ર બગડીયા સહિત અંજાર પ્રાંત અધિકારી મેહુલ દેસાઈ ઉપસ્થિત રહ્યા હતા. ઉલ્લેખનીય છે કે, ઉપરાષ્ટ્રપતિ આજે ધોરડો સફેદ રણની મુલાકાત લઈને સાંસ્કૃતિક કાર્યક્રમમાં હાજરી આપશે. આ સાથે જ તા. 19મી ફેબ્રુઆરીના રોજ તેઓ વૈશ્વિક ધરોહર હડપ્પપન સાઈટ ધોળાવીરાની પણ મુલાકાત લેવા જઈ રહ્યા છે.