પંચમહાલ : ભારે પવન સાથેના વરસાદથી વેજમા ગામે 7 મકાનોને નુકશાન

પંચમહાલ જિલ્લાના મોરવા હડફ તાલુકાના વેજમા ગામે ભારે પવન સાથે વરસેલા વરસાદથી 7 જેટલા મકાનોને નુકશાન પહોચતા ધારાસભ્ય નિમિષા સુથારએ તાલુકા વિકાસ અધિકારીને સાથે રાખીને ગામની મુલાકાત લીધી હતી.

હવામાન વિભાગની આગાહી અનુસાર, રાજ્યના છેલ્લા કેટલાક વિસ્તારોમાં છૂટોછવાયો વરસાદ પડી રહ્યો છે, ત્યારે પંચમહાલ જિલ્લાના મોરવા હડફ તાલુકામાં ગત મંગળવારની રાત્રીએ વાતાવરણમાં પલટો આવવા સાથે મેઘરાજાના ધમાકેદાર આગમનથી વાતાવરણમાં ઠંડક પ્રસરી હતી, જ્યારે ભારે પવન સાથે વરસેલા વરસાદથી તાલુકાના વેજમા ગામ ખાતે રહેણાંક મકાનોના છત પરના પતરા ઉડી જતા ઘર માલિકો ચિંતિત થઈ ઉઠ્યા હતા. આ ગામમાં 7 જેટલા મકાનોને નુકશાન થયું હોવાની જાણ થતાં જ ધારાસભ્ય નિમિષા સુથાર અને તાલુકા વિકાસ અધિકારી સહિત તાલુકાના ભાજપ અગ્રણીઓએ સ્થળ મુલાકાત લીધી હતી. આ સાથે જ ધારાસભ્ય નિમિષા સુથારે અસરગ્રસ્તોને મળવાપાત્ર સહાય વહેલી તકે મળે તે માટે તાલુકા વિકાસ અધિકારીને જણાવ્યું હતું.