પાટણ : કોંગ્રેસ પ્રદેશ પ્રમુખ જગદીશ ઠાકોરની વરાણાના ખોડિયાર ધામે સાકર-તુલા કરાય...

પાટણ જિલ્લાના સમી તાલુકાના વરાણા ગામ સ્થિત ખોડિયાર માતાજીના મંદિરે રાધનપુર ઠાકોર સમાજ દ્વારા ગુજરાત કોંગ્રેસ પ્રદેશ પ્રમુખ જગદીશ ઠાકોરની સાકર-તુલા કરવામાં આવી હતી.

ગુજરાત કોંગ્રેસ પ્રદેશ પ્રમુખ જગદીશ ઠાકોર પાટણ જિલ્લાના રાધનપુર ખાતે એક ધાર્મિક પ્રસંગે હાજરી આપવા પહોચ્યા હતા. ત્યારબાદ જગદીશ ઠાકોર સમી તાલુકાના વરાણા ગામ સ્થિત ખોડિયાર માતાજીના મંદિરે દર્શન કરવા પહોચ્યા હતા, જ્યાં ખોડિયાર માતાના દર્શન કરી કોંગ્રેસ પ્રદેશ પ્રમુખે ધન્યતા અનુભવી હતી. રાધનપુર વિસ્તારના ઠાકોર સમાજના પ્રમુખ શંકરજી મોતીજી ઠાકોર સહિતના આગેવાનો દ્વારા જગદીશ ઠાકોરની સાકર-તુલા કરવામાં આવી હતી. આ પ્રસંગે રાધનપુર વિધાનસભાના ધારાસભ્ય રઘુ દેસાઈ, જિલ્લા કોંગ્રેસ પ્રમુખ શંકરજી ઠાકોર, યુવા મોરચા કોંગ્રેસ ગુજરાત મહામંત્રી આદિત્ય ઝુલા સહિત સમગ્ર જિલ્લાના કોંગ્રેસના આગેવાનો અને કાર્યકર્તાઓ ઉપસ્થિત રહ્યા હતા.