સાબરકાંઠા : હિંમતનગર માર્કેટિંગ યાર્ડ ખાતે ઘઉંની મબલખ આવક, ખેડૂતોને સારા ભાવ મળતા ખુશીનો માહોલ છવાયો

• હિંમતનગર માર્કેટિંગ યાર્ડમાં ઘઉંની મબલખ આવક

• માર્કેટિંગ યાર્ડમાં ઉંચા ભાવ મળતા ખેડૂતોમાં ખુશી

• 15000 બોરીની આવકથી યાર્ડ ઉભરાયું

• ખેડૂતોને મળી રહયા છે કવોલિટી પ્રમાણે ઉંચા ભાવ

• ઘઉંના ભાવમાં વધારો થવાની શક્યતા વ્યક્ત કરાઈ 

સાબરકાંઠા જીલ્લાના હિંમતનગર માર્કેટિંગ યાર્ડ ખાતે ઘઉંની અધધ આવક શરૂ થઈ છે. અત્યાર સુધીમાં તમામ યાર્ડ કરતા હરાજીમાં સૌથી ઉંચા ભાવ મળતા ખેડૂતોમાં પણ ખુશીનો માહોલ જોવા મળી રહ્યો છે.તો આવનાર સમયમાં ઘઉંનો ભાવ આસમાને પહોંચે તેવી શક્યતા વ્યક્ત કરવામાં આવી રહી છે.

સાબરકાંઠા જીલ્લાના હિંમતનગર માર્કેટિંગ યાર્ડ ખાતે તમામ સિઝનમાં ટ્રેક્ટરનો ભરાવો થતો હોય છે. ત્યારે ઘઉંની સિઝન છેલ્લા 10 દિવસથી શરૂ થઈ છે અને આજે તો ઘઉંની અધધ આવક પણ થઈ છે. માર્કેટિંગ યાર્ડમાં દરરોજ સરેરાશ 10000 થી 15000 બોરી ઘઉંની આવક પણ થઈ છે.ભાવની વાત કરીએ તો 480 થી લઈને 725 રૂપિયા પ્રતિમણના ક્વોલિટી પ્રમાણે ભાવ મળી રહ્યા છે,ત્યારે ખેડૂતોને પૂરતા ભાવ મળતા ખેડૂતોમાં પણ ખુશી જોવા મળી છે અને મોટી સંખ્યામાં ખેડૂતો અહીં ઘઉં વેચી રહ્યા છે.

ઘઉંની સિઝનની શરૂઆતથી જ હિંમતનગર માર્કેટિંગ યાર્ડ ખાતે ઘઉંની આવક શરૂ થઈ ગઈ છે અને જાહેર હરાજીમાં ખેડૂતોને ઘઉંની ક્વોલિટી પ્રમાણે ભાવ મળી રહ્યા છે. સરેરાશ ભાવની વાત કરીએ તો 580થી 725 સુધી સારા ભાવ મળતા હોય છે અને એટલે સાબરકાંઠા જીલ્લા ઉપરાંત અન્ય જીલ્લા અને તાલુકાઓમાંથી ઘઉંની આવક અહીં વધુ થાય છે, જેને લઈ હિંમતનગર માર્કેટિંગ યાર્ડ ખાતે સારી ક્વોલિટી પ્રમાણે ભાવ મળી રહ્યા છે.અત્યાર સુધીમાં 98 હજાર બોરી કરતા પણ વધુ ઘઉંની આવક નોંધાઈ છે તો આજે પણ અંદાજે 15000 બોરીની આવક આવી છે એટલે કે હિંમતનગર માર્કેટમાં સારા ભાવ મળવાની આશાએ અન્ય જિલ્લાના ખેડૂતો પણ અહીં આવી ઘઉં વેચી રહ્યા છે.