દાહોદમાં ઇતિહાસની પ્રથમ આગ 8 કલાક વીતવા આવ્યા હોવા છતાંય સ્પેર પાર્ટની દુકાનમાં આગ ઉપરથી કાબુ ન મેળવાયો લાખો રૂપિયાનો માલ સામાન બળીને ખાક થયો.

દાહોદમાં આગ લાગવાની ઘટનાથી દુકાન માલિકને લાખો રૂપિયાનું નુકશાન થવા પામવાની ઘટના સામે આવી છે. દાહોદના ઇન્દોર-અમદાવાદ નેશનલ હાઈવે પર આવેલી ચિરાગ ઓટો પાર્ટ્સ નામની દુકાનમાં ભભૂકી ઉઠેલી આગે એટલું વિકરાળ સ્વરૂપ ધારણ કર્યું હતું કે, કદાચ દુકાન માલીક અને આસપાસના લોકોને પણ અનુમાન નહી હોય કે, આ વિકરાળ બનેલી આગ દુકાનમાં રાખેલા લાખો રૂપિયાના સામાનને ખાક બનાવી દેશે. દુકાનમાં આગ લાગવાની ઘટનાથી ધુમાડાના ગોટેગોટા દૂર દૂર સુધી જોવા મળ્યા હતા. જોકે આગ લાગવાની ઘટનામાં આસપાસના લોકો ભેગા થતા દુકાન માલિકને જાણ કરાઈ હતી, અને સાથે જ પાલિકાના ફાયર ફાઇટરોને પણ જાણ કરાતા સાધન સામગ્રી લઈને દોડી આવેલા ફાયરના જવાનોએ ચાર ચાર અગ્નિશામક દળના સંસાધનોથી પાણીનો મારો ચલાવી આગને કાબુમાં લેવાનો પ્રયાસ કર્યો હતો. પરંતુ વિકરાળ બનેલી આગે જોતજોતામાં દુકાનમાં મુકેલા લાખો રૂપિયાના સામાનને બાળીને ભસમી ભૂત કરી નાખ્યો હતો. રાત્રીના 9 વાગ્યે આગ લાગવાની ઘટના બની હતી, અને સવારે 4 વાગ્યાં સુધી પણ આગ કાબુમાં આવી ન હતી, ત્યારે લગભગ 8 કલાક સુધી ફાયરના સંસાધનો દ્વારા આગને કાબૂમાં લેવાનો પ્રયાસ કરવામાં આવ્યો હતો. આગ કાબુમાં ન આવતા તમામના જીવ પડીકે બંધાયા હતા. જોકે, કહી શકાય કે, દાહોદના ઇતિહાસની આ પ્રથમ આગ એવી લાગી કે, 8 કલાક બાદ પણ કાબુમાં ન આવી હતી.