શિયાળા દરમિયાન મોસમી શાકભાજી પોષકતત્વોથી ભરપૂર,તો આજે જ તમારા આહારમાં કરો સામેલ

શિયાળાની આ વધતી જતી ઠંડી અને ખાસ શિયાળાની ઋતુ શરૂ થતાં બજારમાં ઘણા શાકભાજી પણ ઉપલબ્ધ હોય છે. આ દિવસોમાં આખું બજાર વિવિધ પ્રકારના લીલા, લાલ, પીળા અને રંગબેરંગી શાકભાજીથી ભરેલું છે. ખાસ કરીને દરેક જગ્યાએ લીલાં શાકભાજી પુષ્કળ પ્રમાણમાં જોવા મળે છે. લીલા પાંદડાવાળા શાકભાજી હોય કે લીલા વટાણા, દરેક ઘરમાં દરરોજ ઘણી બધી મોસમી શાકભાજી ઉપલબ્ધ હોય છે. આ મોસમી શાકભાજી ફક્ત તમારા ભોજનનો સ્વાદ જ નથી વધારતા પણ તમારા સ્વાસ્થ્યને ઘણા ફાયદા પણ આપે છે. તો ચાલો જાણીએ આવી જ કેટલીક મોસમી શાકભાજી વિશે.

લીલા વટાણા :-

હૃદયના સ્વાસ્થ્ય માટે જરૂરી તમામ ખનિજો જેમ કે મેગ્નેશિયમ, પોટેશિયમ અને કેલ્શિયમ તેમાં જોવા મળે છે. તે હાઈ બ્લડ પ્રેશરને નિયંત્રિત કરે છે. શિયાળામાં વટાણાના પરાઠા, શાક, કચોરી, પુલાવ, જેવી અનેક પ્રકારની વાનગીઓ તૈયાર કરવામાં આવે છે.

લીલી ડુંગળી :-

વિટામીન A, C, કેલ્શિયમ, ફોસ્ફરસ, ફોલેટ અને પોટેશિયમથી ભરપૂર લીલી ડુંગળી ખૂબ જ પૌષ્ટિક માનવામાં આવે છે. તે મુખ્યત્વે શિયાળામાં જ જોવા મળે છે. બટેટા અને લીલી ડુંગળીના ભજીયા ખૂબ જ સ્વાદિષ્ટ લાગે છે.

લીલું લસણ :-

લીલા લસણમાં વિટામિન સી, કેલ્શિયમ અને આયર્ન મળી આવે છે અને એલિસિન નામનું એન્ટી-ઓક્સીડેન્ટ પણ મળી આવે છે, જે સ્વાસ્થ્ય માટે ખૂબ જ ફાયદાકારક છે. લીલા લસણનો ઉપયોગ ચટણી, સલાડ, અથાણું અને શાકભાજી બનાવવામાં થાય છે.

કોબીજ :-

આ ઓછી કેલરીવાળી શાકભાજી ફાઈબર, વિટામિન સી, વિટામિન K અને મેંગેનીઝથી ભરપૂર છે. તે પાચનતંત્રને મજબૂત બનાવે છે, હૃદયના સ્વાસ્થ્યનું ધ્યાન રાખે છે અને ચેપથી બચાવે છે.

ફૂલકોબી :-

તેમાં કાર્ટેનોઈડ્સ, વિટામિન્સ, ફાઈબર, દ્રાવ્ય ખાંડ, ફોલેટ અને પોટેશિયમ મળી આવે છે.

બીટ :-

તે નાઈટ્રેટનો સારો સ્ત્રોત છે, જે રક્ત પ્રવાહને સંતુલિત રાખે છે અને બ્લડ પ્રેશરને નિયંત્રણમાં રાખે છે. તે ફોલેટ, મેંગેનીઝ, ફાઈબર, પોટેશિયમ, આયર્ન અને વિટામિન સીનો પણ ઉત્તમ સ્ત્રોત છે. તેને સલાડ તરીકે ખાઓ અથવા સૂપમાં તેનો ઉપયોગ કરો.

ગાજર :-

વિટામિન A થી ભરપૂર ગાજર આંખો અને ત્વચા માટે ખૂબ જ ફાયદાકારક છે. તે એક સારું એન્ટી-ઓક્સીડેન્ટ પણ છે, જેના કારણે તે એન્ટી એજિંગનું કામ કરે છે. આ ઉપરાંત તેમાં વિટામિન K, પોટેશિયમ અને ફાઈબર પણ મળી આવે છે. સલાડ, પુલાવ, હલવો જેવી વાનગીઓ ગાજરમાંથી બનાવવામાં આવે છે.