આ વર્ષે ચોમાસામાં વરસાદના કારણે રાજ્યના અનેક નગરોમાં માર્ગોને થયેલા નુકસાનની મારામત માટે મુખ્યમંત્રી શહેરી સડક યોજના અન્વાયે રકમ ફાળવવા મુખ્યમંત્રીએ મંજૂરી આપી છે, ત્યારે રાજ્યની 157 નગરપાલિકાઓને રોડ રીસરફેસિંગના કામો માટે કુલ રૂ. 100 કરોડ ફાળવવામાં આવશે. જેથી રાજ્યના નાગરિકોની જનસુવિધા અને સુખાકારી વૃદ્ધિની દિશામાં રાજ્ય સરકાર દ્વારા વધુ એક મહત્વપૂર્ણ નિર્ણય લેવામાં આવ્યો છે.

રાજ્યના મુખ્યમંત્રી ભુપેન્દ્ર પટેલે ચોમાસામાં વરસાદને કારણે નગરોના માર્ગો-રસ્તાઓને થયેલા નુકસાનની મરામત માટે સ્વર્ણિમ જયંતી મુખ્યમંત્રી શહેરી વિકાસ યોજના અંતર્ગત મુખ્યમંત્રી શહેરી સડક યોજનામાંથી કુલ ૧૦૦ કરોડ રૂપિયા ૧૫૭ નગરપાલિકાઓને ફાળવવાની મંજૂરી આપી છે. ૧૦૦ કરોડ રૂપિયાની આ રકમમાંથી ‘અ’ વર્ગની ૨૨ નગરપાલિકાઓને પ્રત્યેકને રૂપિયા ૧ કરોડ પ્રમાણે ૨૨ કરોડ રૂપિયા તેમજ ‘બ’ વર્ગની ૩૦ નગરપાલિકાઓને નગરપાલિકા દીઠ રૂપિયા ૮૦ લાખ પ્રમાણે કુલ ૨૪ કરોડ રૂપિયા, ‘ક’ વર્ગની ૬૦ નગરપાલિકાઓને પ્રત્યેકને રૂપિયા ૬૦ લાખ મુજબ કુલ ૩૬ કરોડ રૂપિયા અને ‘ડ’ વર્ગની ૪૫ નગરપાલિકાઓને નગરપાલિકા દીઠ રૂપિયા ૪૦ લાખ પ્રમાણે કુલ ૧૮ કરોડ રૂપિયા આવા રોડ રીસરફેસિંગ કામો માટે ફાળવવામાં આવનાર છે.

નગરપાલિકાઓને રસ્તાના મરામત અને રીસરફેસિંગ કામો માટે ગુજરાત મ્યુનિસિપલ ફાઈનાન્સ બોર્ડ મારફતે શહેરી વિકાસ વિભાગ દ્વારા સ્વર્ણિમ જયંતિ મુખ્યમંત્રી શહેરી વિકાસ યોજના અન્વયે મુખ્યમંત્રી શહેરી સડક યોજનામાંથી ગ્રાન્ટ ફાળવવાની દરખાસ્ત રાજ્યના મુખ્યમંત્રી ભુપેન્દ્ર પટેલ સમક્ષ રજૂ કરવામાં આવી હતી, ત્યારે મુખ્યમંત્રીએ આ દરખાસ્તના સંદર્ભમાં ૧૦૦ કરોડ રૂપિયા ફાળવીને લોક સુખાકારીના કામો માટેની આગવી સંવેદના દર્શાવી છે.