હરિયાણામાં બહેનનાં લગ્નમાંથી પરત ફરતા 5 ભાઇઓને કાળ ભરખી ગયો,લગ્નની ખુશીનો માહોલ માતમમાં ફેરવાયો

હરિયાણાના ગોહાનાના ભાવડ ગામમાં લગ્ન પ્રસંગનો માહોલ માતમમાં ફેરવાઇ ગયો હતો.ગામમાં બે દીકરીઓના લગ્નની ઉજવણી ચાલી રહી હતી, જેમાંથી એકની વિદાય થઈ ચૂકી હતી અને બીજીની જાનની પ્રતીક્ષા હતી. ત્યારે જ માર્ગ અકસ્માતમાં રોહતકના પાંચ મિત્રોના મોતના સમાચાર મળતા શરણાઈઓના સૂર મરશીયા બની ગયા હતા.

ખાનપુર કલા સ્થિત ભાવડ ગામમાં જૌહરી નંબરદારના પુત્ર સેવેન્દ્રની પુત્રી સોનિકા અને તેના ભાઈ બિજેન્દ્રની પુત્રી મોનિકાના લગ્ન હતા. સોનિકાના લગ્ન જીંદના કાલવા ગામના ગૌરવ સાથે થયા હતા અને તેની વિદાય થઈ ગઈ હતી. જ્યારે મોનિકાના લગ્ન ઝજ્જરના ફતેહપુરી ગામના રોહિત સાથે નક્કી થયા હતા, જેની જાન સાંજે આવવાની હતી.

મૃતકોમાં સામેલ રોહતકના ઘુસકાની ગામનો રોહિત ઉર્ફે ગોલૂ પરિવારનો એકમાત્ર પુત્ર હતો. તેની એક બહેન છે જેના લગ્ન થઈ ચૂક્યા છે. આશ્ચર્ય અને દુઃખની વાત એ છે કે રોહિતના લગ્ન પણ માત્ર બે મહિના પહેલા જ થયા હતા. હવે તેના પરિવારમાં તેની પત્ની અને વૃદ્ધ માતા-પિતા જ બચ્યા છે.

સોનીપતના ગોહાનામાં ભાવડ-ઘડવાલ લિંક રોડ પર શુક્રવારે સાંજે સાત વાગ્યે આ ભીષણ અકસ્માત સર્જાયો હતો. કારમાં સવાર પાંચ યુવકો લગ્નમાં 'ભાત' ભરવાની વિધિ પતાવીને પરત ફરી રહ્યા હતા, ત્યારે તેમની કાર બેકાબૂ થઈને એક ઝાડ સાથે અથડાઈ હતી. 

ઘટના અંગે માહિતી મળતાની સાથે જ સ્થાનિક પોલીસ ઘટના સ્થળે પહોંચી હતી. ઘાયલ યુવકોને ખાનપુર કલાં ખાતેની ભગ ફૂલસિંહ મેમોરિયલ મહિલા મેડિકલ કોલેજ સારવાર માટે ખસેડાયા હતા. અહીં ડોક્ટર્સે પાંચ યુવકોને મૃત જાહેર કર્યા હતા. જ્યારે રાજકિશન નામના એક યુવકની સ્થિતિ ગંભીર હોવાથી તેને તત્કાલ રોહતક ખાતે રિફર કરાયો હતો. જ્યારે એક અન્ય યુવાન અશોકની ખાનપુર મેડિકલ કોલેજમાં જ સારવાર ચાલી રહી છે.