ઉત્તર પ્રદેશના કન્નૌજમાં સર્જાઇ દુર્ઘટના, લિન્ટલ નાખતી વખતે શટરિંગ તૂટી, 40 થી વધુ મજૂરો દટાયા

ઉત્તર પ્રદેશના કન્નૌજ રેલ્વે સ્ટેશન પર અમૃત ભારત સ્ટેશન યોજના હેઠળ ચાલી રહેલા બાંધકામ દરમિયાન, લિન્ટલ નાખતી વખતે શટરિંગ તૂટી પડ્યું, જેમાં 40 થી વધુ મજૂરો દટાઈ ગયા. રેસ્ક્યુ ટીમોએ અત્યાર સુધીમાં 28 મજૂરોને બહાર કાઢી લીધા છે અને તેમને હોસ્પિટલમાં દાખલ કરાવ્યા છે, જેમાંથી છની હાલત ગંભીર છે. કાટમાળ નીચે વધુ મજૂરો દબાયેલા હોવાની શક્યતા છે, જેમને બચાવવા માટે રાહત અને બચાવ કામગીરી ચાલુ છે. કાટમાળ નીચે ફસાયેલા અન્ય લોકોને શોધવા માટે ડ્રોન, ડોગ સ્ક્વોડ અને અન્ય ટેકનોલોજીનો ઉપયોગ કરવામાં આવી રહ્યો છે. રેલવેએ આ ઘટનાની તપાસના આદેશ આપ્યા છે. 

કાનપુરના ડિવિઝનલ કમિશનર કે વિજયેન્દ્ર પાંડિયને જણાવ્યું કે શનિવાર મોડી રાત સુધીમાં, 28 મજૂરોને બચાવી લેવામાં આવ્યા અને કન્નૌજ, કાનપુર અને લખનૌ જિલ્લાની વિવિધ હોસ્પિટલોમાં દાખલ કરવામાં આવ્યા છે. તેમણે કહ્યું કે ઘટનાસ્થળે બચાવ કામગીરી હજુ પણ ચાલુ છે. NDRFની ટીમ પણ કાટમાળ હટાવવામાં લાગેલી છે. ઉત્તરપૂર્વ રેલ્વેના પ્રવક્તા પંકજ કુમાર સિંહે જણાવ્યું કે ગંભીર રીતે ઘાયલ થયેલા દરેકને 2.5 લાખ રૂપિયા અને સામાન્ય રીતે ઘાયલ થયેલા દરેકને 50,000 રૂપિયાની આર્થિક મદદ કરવામાં આવશે.