USએ ભારતને 1400થી વધુ પ્રાચીન શિલ્પો પરત કર્યા, જેની કિંમત 80 કરોડથી વધુ છે

અમેરિકાએ ભારતને 1400થી વધુ પ્રાચીન મૂર્તિઓ પરત કરી છે. તેની કિંમત કરોડોમાં છે. આ કલાકૃતિઓ દેશના વિવિધ વિસ્તારોમાંથી ચોરાઈ હતી.

દેશભરમાં ઘણી કિંમતી મૂર્તિઓ છે, પરંતુ ચોરો દ્વારા ઘણી મૂર્તિઓની ચોરી કરીને વેચવામાં આવી હતી. જેની કિંમત કરોડો રૂપિયા આંકવામાં આવી છે. આવી કેટલીક ચોરાયેલી મૂર્તિઓ અમેરિકા પહોંચી અને ન્યૂયોર્ક મ્યુઝિયમમાં પણ રાખવામાં આવી.

અમેરિકાએ દક્ષિણ અને દક્ષિણ-પૂર્વ એશિયાના દેશોમાંથી ચોરાયેલી કલાકૃતિઓને પરત કરવાની પહેલ શરૂ કરી છે. આ અંતર્ગત 10 મિલિયન ડોલર (84 કરોડ)ની કિંમતની 1400થી વધુ લૂંટાયેલી કલાકૃતિઓ ભારતને પરત કરવામાં આવી છે, જે દેશના વિવિધ વિસ્તારોમાંથી ચોરાઈ હતી.

ભારતમાંથી લૂંટાયેલી અને ચોરાયેલી કલાકૃતિઓ બુધવારે ન્યૂયોર્ક, યુએસએમાં મેનહટન ડિસ્ટ્રિક્ટ એટર્નીની ઓફિસમાં પરત કરવામાં આવી હતી. પુનઃપ્રાપ્ત કરાયેલી કલાકૃતિઓમાં આવી ઘણી વસ્તુઓ છે, જે તાજેતરમાં ન્યુયોર્કના મેટ્રોપોલિટન મ્યુઝિયમ ઓફ આર્ટમાં પ્રદર્શિત કરવામાં આવી હતી. તેમાં એક દૈવી નૃત્યાંગનાની પથ્થરની પ્રતિમાનો પણ સમાવેશ થાય છે, જેને મધ્ય ભારતથી લંડનમાં દાણચોરી કરીને ત્યાં વેચવામાં આવી હતી.

યુ.એસ. દ્વારા ભારતને પરત કરવામાં આવેલી પ્રાચીન વસ્તુઓમાં 1980ના દાયકામાં મધ્યપ્રદેશના એક મંદિરમાંથી લૂંટાયેલી દેવી નૃત્યાંગનાની રેતીના પથ્થરની મૂર્તિનો સમાવેશ થાય છે. જે ચોરી કરીને લંડન લઈ જવામાં આવી હતી અને આ મૂર્તિની તસ્કરી કરવા માટે ચોરોએ પ્રતિમાને બે ભાગમાં વહેંચી દીધી હતી.

જેથી તેની સરળતાથી દાણચોરી કરી શકાય, બાદમાં આ પ્રતિમાના બંને ભાગોને જોડીને મ્યુઝિયમને દાનમાં આપવામાં આવ્યા હતા. આ સાથે 1960ના દાયકામાં રાજસ્થાનના તનેસરા-મહાદેવ ગામમાંથી લૂંટાયેલી લીલા-ભૂરા રંગની તનેસર દેવીની મૂર્તિનો સમાવેશ થાય છે. જેમને ટૂંક સમયમાં ભારત પરત લાવવામાં આવશે.

જુલાઈમાં, ભારત અને યુએસએ ગેરકાયદેસર વેપારને રોકવા અને ચોરાયેલી પ્રાચીન વસ્તુઓ ભારતને પરત કરવાની પ્રક્રિયા શરૂ કરી હતી. સપ્ટેમ્બરમાં, અમેરિકાએ ભારતને ચોરાયેલી 297 પ્રાચીન વસ્તુઓ પરત કરી, જે લગભગ 4000 વર્ષ જૂની છે.

મેનહટન ડિસ્ટ્રિક્ટ એટર્ની એલ્વિન એલ. બ્રેગે જણાવ્યું હતું કે, અમે ભારતીય સાંસ્કૃતિક વારસાને નિશાન બનાવતા વિવિધ ટ્રાફિકિંગ નેટવર્ક્સની તપાસ કરવાનું ચાલુ રાખીશું. નિવેદનમાં કહેવામાં આવ્યું છે કે બ્રેગના કાર્યકાળ દરમિયાન, ડિસ્ટ્રિક્ટ એટર્નીના એન્ટિક્વિટીઝ ટ્રાફિકિંગ યુનિટે 30 કરતાં વધુ દેશોમાંથી 2,100 થી વધુ ચોરાયેલી પ્રાચીન વસ્તુઓ રિકવર કરી, જેની કિંમત આશરે US$230 મિલિયન છે.