તોફાન 'દાના'ની સંભાવના,પશ્ચિમ બંગાળના ઘણા જિલ્લાઓમાં 26 ઓક્ટોબર સુધી સ્કૂલો બંધ

ચક્રવાતી તોફાન 'દાના'ની સંભાવનાને ધ્યાનમાં રાખીને પશ્ચિમ બંગાળ સરકારે 23 થી 26 ઓક્ટોબર સુધી રાજ્યના ઘણા જિલ્લાઓમાં શાળાઓ બંધ રાખવાની જાહેરાત કરી છે. આ જિલ્લાઓમાં દક્ષિણ 24 પરગણા, ઉત્તર 24 પરગણા, પૂર્વ મેદિનીપુર, પશ્ચિમ મેદિનીપુર, ઝારગ્રામ, બાંકુરા, હુગલી, હાવડા અને કોલકાતાનો સમાવેશ થાય છે. હવામાન વિભાગ (IMD) એ ઓડિશા અને પશ્ચિમ બંગાળ માટે ભારે વરસાદ અને ભારે પવનની ચેતવણી જાહેર કરી છે કારણ કે ચક્રવાત 24 ઓક્ટોબરે દરિયાકાંઠે ટકરાશે. 

હવામાન વિભાગના જણાવ્યા અનુસાર, 21 ઓક્ટોબરના રોજ, બંગાળની ખાડીના પૂર્વ-મધ્ય ભાગમાં એક નીચા દબાણનો વિસ્તાર વિકસિત થયો હતો, જે 23 ઓક્ટોબર સુધીમાં ચક્રવાતી તોફાન 'દાના'માં પરિવર્તિત થવાની સંભાવના છે. આ વાવાઝોડું ધીમે ધીમે પશ્ચિમ-ઉત્તર-પશ્ચિમ દિશામાં આગળ વધી રહ્યું છે અને 24 ઓક્ટોબરે ઓડિશા અને પશ્ચિમ બંગાળના દરિયાકાંઠે પહોંચવાની ધારણા છે.

વાવાઝોડા દરમિયાન પવનની ઝડપ 100 થી 120 કિમી પ્રતિ કલાકની હોઈ શકે છે, જે તે ગંભીર ચક્રવાતી તોફાનમાં ફેરવાઈ જવાનો સંકેત છે. તે પુરી અને સાગર દ્વીપ વચ્ચે ઓડિશા અને પશ્ચિમ બંગાળના દરિયાકાંઠે ટકરાઈ શકે છે.