બિહાર: પ્રદર્શનકારીઓ પર ફાયરિંગ, એકનું મોત, 2 ગંભીર

બિહારના કટિહાર જિલ્લામાં વીજળી વિભાગ વિરુદ્ધ વિરોધ કરી રહેલા ગ્રામજનો પર પોલીસે ગોળીબાર કર્યો. આમાં એક ગ્રામીણનું મોત થયું છે, જ્યારે બે લોકો ગંભીર રીતે ઘાયલ થયા છે. દેખાવકારો દ્વારા કરવામાં આવેલા પથ્થરમારામાં 12થી વધુ પોલીસકર્મીઓ અને વીજળી કર્મચારીઓ પણ ઘાયલ થયા છે.

પોલીસે ફાયરિંગમાં એકના મોતની પુષ્ટિ કરી છે. તેનું નામ ખુર્શીદ આલમ (34) છે, જે બસલ ગામનો રહેવાસી છે. બીજી તરફ બારસોઈના ચાપાખોડ પંચાયતના રહેવાસી નિયાઝ આલમ (32)ની હાલત નાજુક છે. જો કે ગ્રામજનોનો આરોપ છે કે પોલીસ ગોળીબારમાં 5 લોકોને ગોળી વાગી છે. બારસોઈ અનુમંડળમાં બુધવારે બપોરે 12.30 વાગ્યે વીજળી કટ થતાં વિરોધમાં એક હજારથી વધુ લોકો રસ્તા પર ઉતરી આવ્યા હતા.

આંદોલનકારીઓ વીજ કચેરીનો ઘેરાવ કરવા પહોંચ્યા હતા. લોકોએ પ્રાણપુરના બસ્તૌલ ચોક અને બારસોઈ બ્લોક હેડક્વાર્ટરના મુખ્ય માર્ગને જામ કરીને વિરોધ શરૂ કર્યો. આ દરમિયાન પોલીસ ભીડને કાબૂમાં લેવા પહોંચી, પરંતુ ગુસ્સે થયેલા લોકોએ પોલીસ પર પથ્થરમારો કર્યો હતો. પોલીસે પરિસ્થિતિને કાબૂમાં લેવા માટે પહેલા લાઠીચાર્જ કર્યો હતો. ઉશ્કેરાયેલી ભીડ હજુ પણ સંમત ન થઈ, પછી પોલીસે ગોળીબાર કર્યો.