દિલ્હીમાં સિલિન્ડર બ્લાસ્ટ, ત્રણ સગીર ભાઈઓ સહિત ચાર લોકો ગંભીર રીતે દાઝ્યા

ઉત્તર-પૂર્વ દિલ્હીના સુંદર નગરી વિસ્તારમાં શનિવારે બપોરે એક વેરહાઉસમાં CNG સિલિન્ડર વિસ્ફોટ થયો. જેના કારણે ત્રણ સગીર ભાઈઓ સહિત ચાર લોકો ગંભીર રીતે દાઝી ગયા. સ્થાનિક અધિકારીએ જણાવ્યું કે વિસ્ફોટ સાંજે લગભગ 4.30 વાગ્યે સ્ટોરેજ અને રિપેર યુનિટમાં થયો હતો, જ્યાં રિપેર કાર્ય દરમિયાન સિલિન્ડર વિસ્ફોટ થયો હોવાનું કહેવાય છે.

દિલ્હી ફાયર સર્વિસ (DFS) ના અધિકારીએ જણાવ્યું કે ઘાયલ લોકોની ઓળખ અરશદ (22) ઉપરાંત ત્રણ ભાઈઓ સાકિબ (7), અબ્બાસ (9) અને રાજા (3) તરીકે થઈ છે. ત્રણેય બાળકો અફસર નામના વ્યક્તિના પુત્રો છે. પોલીસે જણાવ્યું કે સાકિબ 90 ટકા બળી ગયો છે, અબ્બાસ અને રાજા 85 ટકા અને અરશદ 70 ટકા બળી ગયા છે. અધિકારીએ જણાવ્યું કે ઘટના સમયે અરશદ વેરહાઉસની અંદર કામ કરી રહ્યો હતો. વિસ્ફોટની માહિતી મળતાં, બે ફાયર એન્જિન ઘટનાસ્થળે મોકલવામાં આવ્યા હતા.

'પ્રારંભિક તપાસમાં જાણવા મળ્યું છે કે ચાર માળની રહેણાંક ઇમારતના ગ્રાઉન્ડ ફ્લોર પર એક દુકાનમાં સીએનજી સિલિન્ડર રાખવામાં આવી રહ્યા હતા અને તેનું સમારકામ કરવામાં આવી રહ્યું હતું. 

સમારકામ દરમિયાન, એક સિલિન્ડર ફાટ્યો હોવાના અહેવાલ છે, જેના કારણે જોરદાર વિસ્ફોટ થયો હતો.' પોલીસે જણાવ્યું હતું કે વિસ્ફોટ એટલો શક્તિશાળી હતો કે વેરહાઉસનો લોખંડનો દરવાજો તૂટી ગયો અને તેનો કાટમાળ નજીકમાં રમતા ત્રણ બાળકો પર પડ્યો. ઘાયલોને તાત્કાલિક ગુરુ તેગ બહાદુર (જીટીબી) હોસ્પિટલમાં લઈ જવામાં આવ્યા હતા, જ્યાં તેમની સારવાર ચાલી રહી છે. તેમની હાલત ગંભીર પરંતુ સ્થિર હોવાનું કહેવાય છે. વેરહાઉસના માલિક સામે કાયદેસરની કાર્યવાહી શરૂ કરવામાં આવી છે.