સરકારી ઓઈલ કંપનીઓએ એર ઈંધણના ભાવમાં ઘટાડો કરવાની કરી જાહેરાત

હોળી અને ઈદના અવસર પર હવાઈ મુસાફરી થોડી સસ્તી થઈ શકે છે. એરલાઈન્સને રાહત આપતા સરકારી ઓઈલ કંપનીઓએ એર ઈંધણના ભાવમાં ઘટાડો કરવાની જાહેરાત કરી છે. સ્થાનિક એરલાઇન્સ માટે, એર ટર્બાઇન ઇંધણ (ATF) ની કિંમતમાં 222 રૂપિયા પ્રતિ  લીટરનો ઘટાડો કરવામાં આવ્યો છે. ATFના ભાવમાં ઘટાડા બાદ ઘરેલુ હવાઈ મુસાફરી સસ્તી થઈ શકે છે.

 સરકારી ઓઈલ કંપનીઓએ એવિએશન ઈંધણની કિંમતોની સમીક્ષા કરીને એટીએફની કિંમતો ઘટાડવાનો નિર્ણય કર્યો છે. 1 માર્ચ, 2025 થી ડોમેસ્ટિક એરલાઈન્સ માટે એર ઈંધણના ભાવમાં લગભગ 1.50 ટકાનો ઘટાડો કરવામાં આવ્યો છે. 222 રૂપિયા પ્રતિ કિલોલિટરના ઘટાડા બાદ રાજધાની દિલ્હીમાં એટીએફની કિંમત હવે 95311.72 રૂપિયા પ્રતિ કિલોલિટર થઈ ગઈ છે, જે ગયા મહિને 95533.72 રૂપિયા પ્રતિ કિલોલિટર હતી. કોલકાતામાં ડોમેસ્ટિક એરલાઈન્સે તેમની ફ્લાઈટ્સમાં ATF ભરવા માટે 97588 રૂપિયા પ્રતિ કિલોલીટર ચૂકવવા પડશે. મુંબઈમાં ATFની નવી કિંમત ઘટીને 89070 રૂપિયા થઈ ગઈ છે જે પહેલા 85,318.90 રૂપિયા હતી જ્યારે ચેન્નાઈમાં નવી કિંમત 98,567.90 રૂપિયા થઈ ગઈ છે.

 એર ઈંધણના ભાવમાં ઘટાડાની અસર તરત જ જોવા મળશે. જ્યારે તમે એર ટિકિટ બુક કરો છો ત્યારે ડોમેસ્ટિક એરલાઇન્સ તમારી પાસેથી ફ્યુઅલ સરચાર્જ વસૂલે છે. ATFના ભાવમાં ઘટાડા બાદ ઈંધણ સરચાર્જમાં ઘટાડો થઈ શકે છે. એટીએફની કિંમતો એરલાઇન્સના કુલ સંચાલન ખર્ચના લગભગ 40 ટકા જેટલી હોય છે અને તેમાં વધારો કે ઘટાડો એરલાઇન્સના ખર્ચને પણ અસર કરે છે.