ભારતની પ્રથમ ડિજિટલ લોક અદાલત આ દિવસથી શરૂ થશે, જે આ બંને રાજ્યોની મોટી પહેલ

રાજસ્થાન સ્ટેટ લીગલ સર્વિસીસ ઓથોરિટી (RSLSA) અને મહારાષ્ટ્ર સ્ટેટ લીગલ સર્વિસીસ ઓથોરિટી (MSLSA) દ્વારા 13મી ઓગસ્ટના રોજ ભારતની પ્રથમ સંપૂર્ણ ડિજિટલ લોક અદાલતનું આયોજન કરવામાં આવશે. આ લોક અદાલતનું ડિજીટાઈઝેશન સામાન્ય લોકોને તેમના ઘરના આરામથી ન્યાય મેળવવાની સુવિધા આપશે. દેશભરની વિવિધ અદાલતોમાં કેસોની વધતી સંખ્યાને ધ્યાનમાં લેતા ભારતીય ન્યાયતંત્રના ઈતિહાસમાં આ એક સીમાચિહ્નરૂપ સાબિત થશે.

જણાવી દઈએ કે, રાજસ્થાનના જયપુરમાં આયોજિત 18મી અખિલ ભારતીય કાનૂની સેવા સત્તામંડળની બેઠક દરમિયાન NALSAના અધ્યક્ષ યુયુ લલિત દ્વારા ભારતની પ્રથમ AI-સંચાલિત, આધુનિક ડિજિટલ લોક અદાલતનું ઉદ્ઘાટન કરવામાં આવ્યું હતું. આ પછી તેને મહારાષ્ટ્રમાં પણ લોન્ચ કરવામાં આવ્યું હતું. આ કોર્ટ આર્ટિફિશિયલ ઈન્ટેલિજન્સથી સંચાલિત થનારી પ્રથમ કોર્ટ છે. ડિજિટલ લોક અદાલત યુપીટી જસ્ટિસ ટેક્નોલોજી દ્વારા ડિઝાઇન અને વિકસાવવામાં આવી છે. આ ડિજિટાઈઝેશન MSLSA ને તેના બેક-એન્ડ વહીવટી કાર્યને સરળ બનાવવામાં મદદ કરશે એટલું જ નહીં, પરંતુ સામાન્ય લોકો માટે પણ ફાયદાકારક રહેશે.

જસ્ટિસ ટેક્નોલૉજીના સ્થાપક અને સીઈઓ રમણ અગ્રવાલે જણાવ્યું હતું કે જ્યુપિટીસની ડિજિટલ લોક અદાલતનો ઉપયોગ મહારાષ્ટ્ર અને રાજસ્થાન દ્વારા પ્રી-ટ્રાયલ તબક્કામાં પેન્ડિંગ વિવાદોને ઝડપથી અને અસરકારક રીતે ઉકેલવા માટે કરવામાં આવશે. તેમણે જણાવ્યું હતું કે જ્યુપીટીસની ઓનલાઈન સેવાઓથી લોક અદાલતનું વહીવટી કાર્ય માત્ર વધુ ખર્ચ અસરકારક બનશે એટલું જ નહીં પરંતુ પ્રક્રિયા સાથે સંકળાયેલા તમામ હિતધારકો માટે કાર્યક્ષમતા, સુવિધા અને પારદર્શિતા પણ સુનિશ્ચિત થશે.