છ વખત ધારાસભ્ય, ત્રણ વખત મંત્રી, જાણો ઝારખંડના નવા મુખ્યમંત્રી વિશે

ચંપાઈ સોરેને ઝારખંડના મુખ્યમંત્રી પદના શપથ લીધા છે. હેમંત સોરેનના રાજીનામા બાદ ચંપા મુખ્યમંત્રી બન્યા છે. ચંપાઈની સાથે વધુ બે મંત્રીઓએ પણ શપથ લીધા છે. ચંપાઈ હેમંત સોરેનની નજીક હોવાનું કહેવાય છે. ચંપાઈ હેમંત સરકારમાં કેબિનેટ મંત્રીની જવાબદારી નિભાવી રહ્યા હતા. જેએમએમ ઉપરાંત કોંગ્રેસ અને આરજેડી પણ સરકારમાં સહયોગી છે.

કોણ છે ચંપાઈ સોરેન?

ચંપાઈ સોરેન ઝારખંડ વિધાનસભાના સભ્ય છે. હાલમાં તેઓ ઝારખંડ મુક્તિ મોરચા પાર્ટી તરફથી સરાયકેલા વિધાનસભા બેઠક પરથી ધારાસભ્ય છે. કેબિનેટ મંત્રી તરીકે તેઓ હેમંત સોરેન સરકારમાં પરિવહન, અનુસૂચિત જનજાતિ અને અનુસૂચિત જાતિ અને પછાત વર્ગ કલ્યાણ વિભાગની જવાબદારી સંભાળતા હતા. ચંપાઈએ 1974માં જમશેદપુરની રામ કૃષ્ણ મિશન હાઈસ્કૂલમાંથી 10મા ધોરણનો અભ્યાસ કર્યો હતો. જ્યારે બિહારથી અલગ ઝારખંડ રાજ્યની માંગ ઉઠી રહી હતી, ત્યારે ચંપાઈનું નામ સમાચારોમાં રહ્યું હતું. શિબુ સોરેનની સાથે ચંપાઈએ પણ ઝારખંડના આંદોલનમાં ભાગ લીધો હતો. આ પછી જ લોકો તેમને ‘ઝારખંડ ટાઈગર’ કહેવા લાગ્યા. 1991માં પેટાચૂંટણી જીતીને ચંપાઈ સંયુક્ત બિહારમાં પ્રથમ વખત ધારાસભ્ય બન્યા હતા. કેસી માર્ડીના રાજીનામા બાદ ચંપાઈએ અપક્ષ તરીકે ચૂંટણી જીતી હતી. ત્યારબાદ 1995માં જેએમએમની ટિકિટ પર ચૂંટણી જીતીને ધારાસભ્ય બન્યા.

2005 માં, ચંપાઈ ઝારખંડ વિધાનસભા માટે ચૂંટાયા. આ પછી તેઓ 2009માં ધારાસભ્ય પણ બન્યા હતા. તેમણે અર્જુન મુંડા સરકારમાં સપ્ટેમ્બર 2010 થી જાન્યુઆરી 2013 સુધી વિજ્ઞાન અને ટેક્નોલોજી, શ્રમ અને આવાસ મંત્રી તરીકેની જવાબદારી નિભાવી હતી. તેઓ જુલાઈ 2013 થી ડિસેમ્બર 2014 સુધી અન્ન અને નાગરિક પુરવઠા અને પરિવહનના કેબિનેટ મંત્રી હતા.

2014માં ફરી ઝારખંડ વિધાનસભા માટે ચૂંટાયા. તેઓ 2019માં ધારાસભ્ય પણ બન્યા હતા. આ સાથે તેઓ હેમંત સરકારમાં પરિવહન, અનુસૂચિત જનજાતિ, અનુસૂચિત જાતિ અને પછાત વર્ગ કલ્યાણ મંત્રી બન્યા. 2019 માં, ચંપાઈએ તેમની સંપત્તિ 2.55 કરોડ રૂપિયા જાહેર કરી હતી.