'તેજશ્વી યાદવનો જીવ જોખમમાં છે, તેમને મારવાના ચાર પ્રયાસો થયા', રાબડી દેવીએ કર્યો મોટો દાવો

બિહારમાં વિધાનસભા ચૂંટણીને આડે હવે થોડા મહિના બાકી છે. ચૂંટણી નજીક આવતાં શાસક અને વિપક્ષી પક્ષો વચ્ચે રાજકીય યુદ્ધ ચરમસીમાએ છે. બિહાર વિધાનસભાના ચોમાસા સત્રમાં પણ શાસક અને વિપક્ષી પક્ષો વચ્ચે તીવ્ર ટક્કર જોવા મળી છે. દરમિયાન, શુક્રવારે બિહારના ભૂતપૂર્વ મુખ્યમંત્રી રાબડી દેવીએ એવો દાવો કર્યો છે જેણે બધાને ચોંકાવી દીધા છે. રાબડી દેવીએ કહ્યું છે કે તેમના પુત્ર અને વિધાનસભામાં વિપક્ષી નેતા તેજસ્વી યાદવનો જીવ જોખમમાં છે.

રાબડી દેવીના આ ચોંકાવનારા દાવાની ચર્ચા બધે થઈ રહી છે. શુક્રવારે, પટણામાં, રાબડી દેવીએ કહ્યું કે "તેજશ્વીનો જીવ જોખમમાં છે. તેજસ્વી યાદવને મારવાના ચાર પ્રયાસો થયા હતા. તેમને મારવાના પ્રયાસો થઈ રહ્યા છે. જેડીયુ અને ભાજપ સિવાય કોણ કાવતરું કરશે? તે લોકો સંસ્કારહીન છે. તેઓ ગટરના કીડા છે."

બિહારમાં વિધાનસભા ચૂંટણી આ વર્ષના અંતમાં ઓક્ટોબર-નવેમ્બર મહિનામાં યોજાઈ શકે છે. રાજ્યમાં કુલ 243 બેઠકો માટે મતદાન થશે. કોઈપણ પક્ષને બહુમતી અને સત્તા મેળવવા માટે 122 બેઠકોની જરૂર પડશે. તમને જણાવી દઈએ કે ચૂંટણીમાં મુખ્ય મુકાબલો ભાજપ, જેડીયુ, એલજેપી (રામ વિલાસ), જીતન રામ માંઝી અને ઉપેન્દ્ર કુશવાહાના પક્ષના એનડીએ ગઠબંધન અને આરજેડી, કોંગ્રેસ અને કેટલાક અન્ય પક્ષોના મહાગઠબંધન વચ્ચે છે. આ ઉપરાંત, પ્રશાંત કિશોરના જન સૂરજ અને ઓવૈસીના એઆઈએમઆઈએમ પણ ચૂંટણી મેદાનમાં છે.