આંતરરાષ્ટ્રીય ક્રિકેટ પરિષદે ભારતીય ટીમના ભૂતપૂર્વ કેપ્ટન MS Dhoni ને હોલ ઓફ ફેમમાં સામેલ કર્યા છે. તેમને આ સન્માન આંતરરાષ્ટ્રીય અને ભારતીય ક્રિકેટમાં તેમના અજોડ યોગદાન માટે મળ્યું છે. વર્લ્ડ ટેસ્ટ ચેમ્પિયનશિપ ફાઇનલ (WTC Final 2025) ના માત્ર 2 દિવસ પહેલા લંડનમાં એક સમારોહ યોજાયો હતો, જેમાં MS Dhoni સહિત 7 દિગ્ગજ ક્રિકેટરોને હોલ ઓફ ફેમથી સન્માનિત કરવામાં આવ્યા હતા.

ધોની સિવાય મેથ્યુ હેડન, ગ્રીમ સ્મિથ, ડેનિયલ વેટ્ટોરી અને હાશિમ અમલાને પણ હોલ ઓફ ફેમથી સન્માનિત કરવામાં આવ્યા છે. ધોની આ યાદીમાં સામેલ થનારા 11મો ભારતીય ક્રિકેટર બન્યો છે. ધોનીને આંતરરાષ્ટ્રીય નિવૃત્તિના લગભગ 5 વર્ષ પછી આ સન્માન મળ્યું છે. ધોનીએ 15 ઓગસ્ટ 2020 ના રોજ આંતરરાષ્ટ્રીય ક્રિકેટમાંથી નિવૃત્તિ લીધી હતી. MS Dhoni ની છેલ્લી મેચ 2019ના વર્લ્ડ કપની સેમિફાઇનલ મેચ હતી.

ધોની 'કેપ્ટન કૂલ' તરીકે જાણીતો હતો, જે સૌથી સફળ ભારતીય કેપ્ટનોમાંના એક પણ હતો. ભારતે તેમની કેપ્ટનશીપ હેઠળ 3 ICC ટ્રોફી જીતી હતી. ધોનીના નેતૃત્વમાં ટીમ ઈન્ડિયાએ 2007 T20 વર્લ્ડ કપ, 2011 વન-ડે વર્લ્ડ કપ અને 2013 ચેમ્પિયન્સ ટ્રોફી જીતી હતી.

એમએસ ધોનીએ 2004માં બાંગ્લાદેશ સામેની વન-ડે મેચમાં આંતરરાષ્ટ્રીય ક્રિકેટમાં ડેબ્યૂ કર્યું હતું. ત્રણ વર્ષ પછી 2007માં તેને ટીમ ઈન્ડિયાની કેપ્ટનશીપ મળી હતી. 2007ના T20 વર્લ્ડ કપમાં ભારતીય ટીમ એક યુવાન ખેલાડીની કેપ્ટનશીપમાં રમી રહી હતી, પરંતુ જ્યારે ભારતે ફાઇનલમાં પાકિસ્તાનને હરાવ્યું, ત્યારે સમગ્ર ભારતે ઉજવણી કરી હતી. એમએસ ધોનીની કેપ્ટનશીપ હેઠળ ભારતે 2010 અને 2016માં એશિયા કપનો ખિતાબ પણ જીત્યો હતો. તેમને 2008 અને 2009માં ICC પ્લેયર ઓફ ધ યરનો એવોર્ડ પણ મળ્યો હતો.