જાન્યુઆરી 2024માં શ્રીલંકાના ટેસ્ટ કેપ્ટન તરીકે નિયુક્ત થયેલા ધનંજય ડી સિલ્વાએ તાત્કાલિક અસરથી આ પદ છોડી દીધું છે. શ્રીલંકાની પસંદગી સમિતિને લખેલા પત્રમાં ડી સિલ્વાએ જણાવ્યું હતું કે, “હું માનું છું કે કેપ્ટનપદની જવાબદારી આગામી પેઢીને સોંપવી જોઈએ.”
ડી સિલ્વાએ પુષ્ટિ કરી હતી કે, તેઓ ખેલાડી તરીકે શ્રીલંકા માટે રમવાનું ચાલુ રાખશે. શ્રીલંકા ક્રિકેટના સીઈઓ એશ્લે ડી સિલ્વાએ ટેસ્ટ ક્રિકેટમાં તેમના યોગદાન બદલ તેમનો આભાર માન્યો હતો. “શ્રીલંકા ક્રિકેટ તેમની બાકીની કારકિર્દી માટે તેમને શુભેચ્છા પાઠવે છે, અને અમારી ટેસ્ટ ટીમનું નેતૃત્વ કરવા બદલ તેમનો આભાર માને છે.” દિમુથ કરુણારત્ને પાસેથી કેપ્ટનપદ સંભાળ્યા બાદ, ડી સિલ્વાએ 18 ટેસ્ટ મેચોમાં શ્રીલંકાનું નેતૃત્વ કર્યું હતું; જેમાં ટીમ સાત મેચ જીતી, આઠ હારી અને ત્રણ મેચ ડ્રો રહી હતી.
કેપ્ટન તરીકે, તેમણે 36.45ની સરેરાશથી 1,130 રન બનાવ્યા અને 44.44ની બોલિંગ સરેરાશથી નવ વિકેટ ઝડપી હતી. જુલાઈ 2016માં ડેબ્યૂ કરનાર ડી સિલ્વાએ અત્યાર સુધીની કારકિર્દીમાં 69 ટેસ્ટ મેચ રમી છે. 123 ઇનિંગ્સમાં તેમણે 38.86ની સરેરાશ અને 58.01ના સ્ટ્રાઇક રેટથી 4,431 રન બનાવ્યા છે.
તેમણે ટેસ્ટમાં 13 સદી અને 20 અડધી સદી ફટકારી છે, જેમાં તેમનો સર્વોચ્ચ સ્કોર 173 રન છે. શ્રીલંકાના આ ઓલરાઉન્ડરે 100 ટેસ્ટ ઇનિંગ્સમાં 43 વિકેટ ઝડપી છે. આ ઉપરાંત, તેમણે 93 વન-ડે (ODI) મેચોની 85 ઇનિંગ્સમાં 1,924 રન બનાવ્યા છે. આ સમયગાળા દરમિયાન, તેમણે 10 અડધી સદી ફટકારી હતી અને 48 વિકેટ પણ ઝડપી હતી. ડી સિલ્વાએ 48 T20 આંતરરાષ્ટ્રીય મેચોમાં 890 રન બનાવ્યા છે અને 17 વિકેટ ઝડપી છે.
