• સુરત સાયબર ક્રાઇમ સેલને મળી સફળતા

• ડિજિટલ અરેસ્ટ ગેંગનો કર્યો પર્દાફાશ

• ત્રણ આરોપીઓ ઝડપાયા

• બાસ્કેટબોલ પ્લેયરની સંડોવણી

• બેંક એકાઉન્ટ ભાડે લઈને આચરતા કૌભાંડ

સુરત શહેરના સાયબર ક્રાઇમ સેલે દેશમાં દહેશત મચાવનાર ડિજિટલ અરેસ્ટ ગેંગનો પર્દાફાશ કરતા અત્યંત ચોંકાવનારી વિગતો બહાર આવી છે. સમગ્ર કૌભાંડમાં એક નેશનલ લેવલનો બાસ્કેટબોલ પ્લેયર પણ સામેલ છે,પોલીસે  હાલ ત્રણ આરોપીઓની ધરપકડ કરીને વધુ તપાસ શરૂ કરી છે.

સુરતના સિનિયર સિટિઝનને ફોન કરીને ડરાવ્યા બાદ તેમના ખાતામાં રૂપિયા રૂપિયા 2.5 કરોડનો ફ્રોડ થયો હોવાનું જણાવી તેમને “ડિજિટલ અરેસ્ટ” હેઠળ રાખવામાં આવ્યા હતા.અને ભયના માહોલમાં આશરે 16.65 લાખ રૂપિયા તેમના ખાતાથી ટ્રાન્સફર કરાવાયા હતા. આ સમગ્ર કૌભાંડ બાદ સુરત સાયબર સેલે તાત્કાલિક તપાસ હાથ ધરી હતી.આ ગુનાનો ભેદ ઉકેલવામાં પોલીસને સફળતા મળી છે,અને ચોંકાવનારી હકીકત બહાર આવી હતી.આ કેસમાં પોલીસે ત્રણ આરોપીની ધરપકડ કરી છે.

જે આરોપીના નામ સામે આવ્યા છે,એમાંથી એક નામ ખાસ ધ્યાન ખેંચે છે અને તે છે પરમવીરસિંહ, જે એક નેશનલ લેવલનો બાસ્કેટબોલ પ્લેયર રહ્યો છે. તેણે દેશ માટે રમત રમવાની જગ્યાએ હવે સાયબર ફ્રોડનો રસ્તો અપનાવ્યો છે. પરમવીરસિંહે જે બેંક એકાઉન્ટ ભાડે લઇ સાયબર ફ્રોડની ઘટનાને અંજામ આપ્યા છે, એ તમામ બેંક એકાઉન્ટ દેશભરમાં થયેલી 40 સાયબર ફ્રોડની ઘટનામાં વપરાયા છે.

પરમવીર પંજાબી ગાયક સિદ્ધુ મૂસેવાલાનો ભારે ચાહક છે. તેણે તેના હાથ પર મૂસેવાલાનું 12 ઇંચ લાંબુ ટેટૂ બનાવ્યું છે, જે તેની મુસેવાલા પ્રત્યેની દીવાનગી દર્શાવે છે.

આ ઘટનાની તપાસ દરમિયાન સુરત સાયબર સેલે ભાવનગરથી ત્રણ આરોપીની ધરપકડ કરી હતી, જેમાં પરમવીરસિંહ, પૂર્વ નેશનલ બાસ્કેટબોલ પ્લેયર, કિશનકુમાર પટેલ, શેરબ્રોકર, રાજુ પરમાર, બેંક એકાઉન્ટ ભાડે આપનારનો સમાવેશ થાય છે.

પોલીસ તપાસમાં જાણવા મળ્યું હતું કે પરમવીર પાસે જુદી જુદી બેંકનાં 15 ડેબિટ કાર્ડ, 4 પાસબુક અને 11 ચેકબુક મળ્યાં છે. પરમવીરે પોતે કોઈ નોકરી કે ધંધો કરતો ન હોવા છતાં અલગ અલગ બેંક ખાતા મેળવી કૌભાંડ કર્યું હતું. રાજુ પરમારે પોતાનું બેંક ખાતું કિશન પટેલને ભાડે આપ્યું હતું, જેને બાદમાં પરમવીર સિંહના નામે ઓપરેટ કરાતું હતું.NCCRP પોર્ટલ પર આ ખાતા દ્વારા 40થી વધુ ફ્રોડ નોંધાયા હોવાનું જાણવા મળ્યું છે.