સીમાડા નાકા વિસ્તારમાં બની આગ લાગવાની ઘટના

વાલમ નગરમાં 3 માળના મકાનમાં આગ ફાટી નીકળી

જોબ વર્કની કામગીરી દરમ્યાન આગ લાગતાં દોડધામ

ઘટનામાં એક વ્યક્તિનું મોત, 5 લોકો દાઝી જતાં ગંભીર

ઇજાગ્રસ્તોની મેયર અને શિક્ષણમંત્રીએ મુલાકાત લીધી

સુરત શહેરના સીમાડા નાકા વિસ્તારમાં 3 માળના મકાનમાં અચાનક આગ ફાટી નીકળતા દોડધામ મચી જવા પામી હતી. આ ઘટનામાં એક વ્યક્તિનું મોત થયું છે, જ્યારે 5 લોકો દાઝી ગયા હતા, ત્યારે સ્મીમેર હોસ્પિટલમાં સારવાર લઈ રહેલા ઇજાગ્રસ્તોની શિક્ષણમંત્રી પ્રફુલ પાનસેરિયાએ અને મેયર દક્ષેશ માવાણીએ મુલાકાત લીધી હતી.

સુરત શહેરના સીમાડા ખાતે આવેલા વાલમ નગરમાં એક મકાનમાં ગ્રાઉન્ડ પ્લસ ત્રીજા માળે પતરાના રૂમમાં પટ્ટા પર ડાયમંડ લગાવવાનું કામકાજ ચાલી રહ્યું હતું. આ દરમિયાન ગમને મિક્સિંગ કરવા માટે કેમિકલ નાખતા સમયે અચાનક આગ ફાટી નીકળી હતી. જેના પગલે અંદર કામ કરી રહેલા 8થી વધુ કારીગરોને અસર થઈ હતી. જેમાં 5 જેટલા કારીગરો દાઝી જતા સ્મીમેર હોસ્પિટલ ખાતે સારવાર અર્થે ખસેડવામાં આવ્યા હતા, જ્યારે એક કારીગરનું ગંભીર રીતે દાઝી જતાં મોત થયું હતું. બનાવની જાણ થતાં જ ફાયર ફાઇટરો તાત્કાલિક ઘટના સ્થળે દોડી આવ્યા હતા, જ્યાં પાણીનો મારો ચલાવી સમગ્ર આગ પર કાબૂ મેળવવા પ્રયાસો હાથ ધર્યા હતા. તો બીજી તરફ, સ્મીમેર હોસ્પિટલમાં સારવાર લઈ રહેલા ઇજાગ્રસ્તોની શિક્ષણમંત્રી પ્રફુલ પાનસેરિયાએ અને મેયર દક્ષેશ માવાણીએ મુલાકાત લીધી હતી. અત્રે ઉલ્લેખનીય છે કે, ટીકી ચોંટાડવા માટે જે કેમિકલનો ઉપયોગ થાય છે, તે ખૂબ જ જ્વલનશીલ હોવાના કારણે આ ઘટના બની હોવાનું અનુમાન લગાડવામાં આવી રહ્યું છે.