સુરત : અલથાણમાં 13મા માળેથી માતા અને બે વર્ષનો પુત્ર ભેદી રીતે પટકાયા, બંનેના મોત,આપઘાતની આશંકા

• માર્તંડ હિલ્સના 13માં માળેથી પટકાયા માતા-પુત્ર

• ગંભીર રીતે ઈજાગ્રસ્ત માતા-પુત્રના કરૂણ મોત

• ગણેશ પંડાલ નજીક જ માતા પુત્ર પટકાયા

• ગણેશોત્સવનો માહોલ શોકમય બન્યો

• અકસ્માત કે આપઘાત પોલીસે શરૂ કરી તપાસ  

સુરતમાં અલથાણ વિસ્તારમાં આવેલા માર્તંડ હિલ્સ એપાર્ટમેન્ટના 13માં માળે થી માતા અને બે વર્ષનો પુત્ર ભેદી રીતે નીચે પટકાતા ઘટનાસ્થળે જ કરુણ મોત નીપજયા હતા. બિલ્ડીંગમાં સ્થાપિત ગણેશ પ્રતિમાના 50 મીટર દુર જ માતા-પુત્ર પટકાયા હતા.આ ઘટના અકસ્માત છે કે આપઘાત તે અંગે પોલીસે તપાસ શરૂ કરી છે.

સુરતમાં લૂમ્સનું કારખાનું ધરાવતા વિશ્લેષકુમાર પટેલ અલથાણ વિસ્તારમાં આવેલા માર્તંડ હિલ્સ બિલ્ડીંગમાં છઠ્ઠા માળે પરિવાર સાથે રહે છે. પરિવારમાં 30 વર્ષીય પત્ની પૂજા અને બે વર્ષીય પુત્ર ક્રિશિવ હતો.

આ દરમિયાન બુધવારે સાંજે પૂજાબેન પુત્ર ક્રિશિવને લઈને કોમ્પ્લેક્સમાં આવેલી સી-વીંગમાં 13મા માળે બ્લાઉઝ સિવડાવવા માટે આપવા માટે ગયા હતા. જોકે, ત્યારબાદ માતા-પુત્ર બંને ભેદી રીતે બિલ્ડીંગની નીચે પટકાતા હતા.

બિલ્ડીંગમાં ગણેશોત્સવનું આયોજન થયું છે. મંડપથી 50 મીટરના અંતરે જ બંને પટકાતા થયેલા અવાજને -પગલે દોડધામ મચી ગઇ હતી. રહીશો એકત્ર થઈ ગયા હતા. માતા- પુત્રને ઇજાગ્રસ્ત જોતા 108ને બોલાવી બંનેને તુરંત નવી સિવિલ હોસ્પિટલમાં ખસેડાયા હતા. પણ ડોકટરે બંનેને મૃત જાહેર કરતા પરિવાર અને શ્રીજી ભક્તિ સાથે ઉલ્લાસભર્યા વાતાવરણ વચ્ચે અચાનક શોકની કાલીમાં છવાઈ ગઈ છે. ઘટના કઈ રીતે બની તે જાણવા પોલીસે ઘટનાસ્થળે પહોંચી તપાસ હાથ ધરી હતી. બંને અકસ્માતે પટકાયા કે માતાએ પુત્રને સાથે લઈને ઝંપલાવી દીધું તે દિશામાં પણ તપાસ ચાલી રહી છે.