સુરત શહેરના લિંબાયત વિસ્તારમાં હાર્ડવેરની દુકાન પાછળ ચાર્જિંગમાં મુકેલ ઇલેક્ટ્રિક વાહનમાં આગ લાગતાં નજીકમાં રહેલા ગેસ સિલિન્ડરમાં પણ પ્રચંડ ધડાકા સાથે બ્લાસ્ટ થયો હતો. આ દુર્ઘટનામાં એક યુવતીનું મોત થયું હતું, જ્યારે 4 લોકોને ગંભીર ઇજાના પગલે સારવાર અર્થે ખસેડવામાં આવ્યા હતા.

સુરત શહેરના લિંબાયત વિસ્તારના મહારાણા પ્રતાપ ચોક નજીક લક્ષ્મી પાર્ક સોસાયટીમાં નીચે હાર્ડવેરની દુકાન અને ઉપર 2 માળનું મકાન આવેલું છે. દુકાનની પાછળ વાડાના ભાગમાં ઇલેક્ટ્રિક વાહન ચાર્જિંગમાં મુક્યું હતું. જેમાં બ્લાસ્ટથી આગ લાગી હતી, અને ત્યાં બાજુમાં જ રહેલા ગેસ સિલિન્ડરમાં પણ આગ લાગતા બ્લાસ્ટ થયો હતો. આ ઘટનામાં એક દીવાલ અને દરવાજો પણ તૂટી ગયો હતો. બનાવની જાણ થતાં ફાયર વિભાગ ઘટના સ્થળે પહોંચ્યું હતું.

આગની ઘટનામાં માં 5 લોકોનો પરિવાર ઝપેટમાં આવ્યો હતો. જેમાં 18 વર્ષીય યુવતી મહિમા દોલારામ સિરાવિ આગમાં ભડથું થઇ ગઇ છે, જ્યારે પરિવારના અન્ય 4 સભ્યો દોલારામ સિરવિ, ચંપાબેન સિરવિ, ચિરાગ સિરવિ અને દેવિકા સિરવિ ગંભીર રીતે દાઝી જતા તમામને સારવાર અર્થે હોસ્પિટલ ખસેડવામાં આવ્યા હતા. અત્રે ઉલ્લેખનીય છે કે, સારવારમાં રહેલા પિતાને દીકરીનું મોત થયું હોવાની જાણ કરવામાં આવી નથી. મૃતક યુવતી ધોરણ 12માં અભ્યાસ કરી રહી હતી. બનાવ સંદર્ભે ડેપ્યુટી મેયર ડો. નરેન્દ્ર પાટીલ પણ ઘટનાસ્થળે અને ત્યારબાદ સ્મીમેર હોસ્પિટલ ખાતે ઇજાગ્રસ્તોની મુલાકાત કરી હતી. તેઓએ જણાવ્યું હતું કે, પાર્કિંગમાં આખી રાત ઈ-બાઈક ચાર્જિંગમાં રહેતા બ્લાસ્ટ થયો હતો, અને આગ લાગી હતી. ઉપરના માળે પરિવાર સૂતો હતો. આગના કારણે ગેસ સિલિન્ડર પણ ફાટ્યો હતો.