• સુરત શહેર તથા જિલ્લામાં મેઘરાજાની તોફાની બેટિંગ

• સતત બીજા દિવસે પણ ધોધમાર વરસાદ યથાવત રહ્યો

• ઠેર ઠેર નીચાણવાળા વિસ્તારોમાં વરસાદી પાણી ભરાયા

• પાણીમાં ફસાયેલા લોકોનું પોલીસકર્મીઓએ રેસક્યું કર્યું

• ટ્રાફિકજામની સ્થિતિ વચ્ચે પોલીસ જવાનો ખડેપગે તૈનાત 

રાજ્યમાં મેઘરાજા મહેર વરસાવી રહ્યા છે. ખાસ કરીને દક્ષિણ ગુજરાતમાં મેઘરાજા તોફાની બેટિંગ કરી રહ્યા છે, ત્યારે સુરતમાં સતત બીજા દિવસે પણ ધોધમાર વરસાદ યથાવત રહ્યો હતો.

સુરત શહેર તથા જિલ્લામાં સતત બીજા દિવસે પણ કાળા ડિબાંગ વાદળોની ફોજ વચ્ચે વરસાદ યથાવત રહ્યો છે. વહેલી સવારથી જ સુરતના અમરોલી, કતારગામ, કાપોદ્રા, જહાંગીરપુરા, સરથાણા, સળિયા હેમાદ, કોસમ ગામ સહિતના વિવિધ વિસ્તારોમાં વરસાદ ખાબક્યો હતો. ભારે વરસાદના કારણે સરથાણા વિસ્તારમાં આવેલી વાલમ નગર સોસાયટીમાં પાણી ભરાયા હતા. સોસાયટીમાં છાતી સમા વરસાદી પાણી ફરી વળતાં ફાયર વિભાગની ટીમ દ્વારા અસરગ્રસ્તોના રેસ્ક્યુ માટેની કામગીરી હાથ ધરવામાં આવી હતી. જેમાં ટ્રેક્ટર તેમજ બોટની મદદથી અસરગ્રસ્ત લોકોને રેસ્ક્યુ કરાયા હતા.

એટલું જ નહીં, તંત્ર દ્વારા લોકોના આરોગ્યની સલામતી માટે તબીબોની ટીમ પણ મોકલવામાં આવી હતી. સુરતના કોસમ ગામમાં પણ વરસાદી પાણી ભરાતા વાહન ચાલકો સહિત રાહદારીઓને ભારે હાલાકી વેઠવાનો વારો આવ્યો હતો. ભારે વરસાદના કારણે ખેતરોમાં પાણી ભરાયા હતા, જ્યારે કોસમથી કતારગામ જતો રસ્તો પણ બંધ થયો હતો. તો બીજી તરફ, ઉપરવાસમાં વરસેલા ભારે વરસાદના પગલે સુરતમાં ખાડીપૂર આવ્યું છે. ખાડીપૂરના કારણે સણીયા હેમાદ ગામ જળમગ્ન બન્યું હતું. ખાડીપૂરની સ્થિતિમાં પોલીસ લોકોના વ્હારે આવી હતી.

સરથાણા પોલીસ મથકના મહિલા ASIએ ગળાડૂબ પાણીમાં 3 લોકોને રેસ્ક્યુ કર્યા હતા. આ તરફ, સરથાણા પોલીસ મથક પણ પાણીમાં ગરકાવ થયું હતું. જોકે, ટ્રેક્ટર મારફતે પોલીસકર્મીઓ લોકોને મદદ કરી રહ્યા છે. જેના પગલે લોકોએ પણ સુરત પોલીસની કામગીરીને બિરદાવી હતી. જોકે, સુરત શહેરમાં વરસાદને લઈ અનેક જગ્યા પર ટ્રાફિકજામના દ્રશ્યો સર્જાયા હતા. શહેરના સહારા દરવાજા, APMC માર્કેટ અને દિલ્લી ગેટ નજીક ટ્રાફિકજામ સર્જાતા પોલીસ અધિકારીઓ ટીમ સાથે નજરે પડ્યા હતા. આ સાથે જ લોકોને પણ આવી પરિસ્થિતિમાં વગર કામે બહાર ન નીકળવા અપીલ પોલીસ વિભાગ દ્વારા અપીલ કરવામાં આવી હતી.