પરિણામ’માં પણ અનોખો સંયોગ : સુરતના જુડવા ભાઈઓનું એક સરખું જ રિઝલ્ટ, એ-વન ગ્રેડ સાથે ઉતીર્ણ થયા...

• શિક્ષણ બોર્ડ દ્વારા ધો-10ના વર્ષ 2025ના પરિણામો જાહેર

• ભક્તિ ઇન્ટરનેશનલ સ્કૂલના 2 વિદ્યાર્થીઓની અનોખી સિદ્ધિ

• 2 જુડવા ભાઈઓએ હાંસલ કર્યુ એક સરખું જ પરિણામ

• રાવળ જીત અને રાવળ જીલનું આવ્યું છે 92% પરિણામ

• મોટા ભાઈના 554 માર્ક્સ, તો નાના ભાઈના 552 માર્ક્સ

સુરત જિલ્લાના વિદ્યાર્થીઓએ માત્ર પરિણામમાં જ નહીં, પરંતુ ગુણવત્તામાં પણ સરખી છાપ છોડી છે. સુરતની ભક્તિ ઇન્ટરનેશનલ સ્કૂલના 2 જુડવા ભાઈઓએ એક સરખું જ પરિણામ હાંસલ કર્યુ છે.

ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ધોરણ 10ના વર્ષ 2025ના પરિણામો જાહેર કરવામાં આવ્યા છે. આ વર્ષે રાજ્યભરનું કુલ પરિણામ 83.08% રહ્યું છે. રાજ્યના તમામ જિલ્લાઓમાં સુરત જિલ્લાએ પોતાની સફળતાની પરંપરા જાળવી રાખી છે. જે 86.20 % પરિણામ સાથે ટોચના સ્થળે પોતાનું સ્થાન સુદ્રઢ કર્યું છે. તો બીજી તરફ, સુરતની ભક્તિ ઇન્ટરનેશનલ સ્કૂલમાં અભ્યાસ કરતો જીલ રાવળ અને તેનો ભાઈ જીત રાવળ જુડવા ભાઈ છે.

જોકે, ધોરણ 10ની બોર્ડની પરીક્ષામાં બન્નેની બેઠક પણ આગળ પાછળ હતી. આજે બન્ને જુડવા ભાઈના ધોરણ 10ના પરિણામ પણ અનોખો સંયોગ રચાયો છે. જેમાં જીલ રાવળ અને જીત રાવળનો A-1 ગ્રેડ આવ્યો છે. મોટા ભાઈના 554 માર્ક્સ, તો નાના ભાઈએ 552 માર્ક્સ મેળવી 92 ટકા અને 97 પર્સેન્ટાઇલ સાથે બન્નેના રિઝલ્ટ પણ સરખા આવ્યા છે. અત્રે ઉલ્લેખનીય છે કે, બન્ને જુડવા ભાઈઓના સપના પણ એક સરખા હોય, તેમ બન્નેને હવે સોફ્ટવેર એન્જિનિયર બનવાની ઈચ્છા છે.