હુમલાના “LIVE” વિડિયો : વડોદરાના મકરપુરામાં 5 લોકોએ યુવાનને ઘેરી લાકડીના ફટકા માર્યા…

વડોદરા શહેરના મકરપુરા વિસ્તારમાંથી બકરો લઇ પસાર થઇ રહેલા યુવાનને સામાન્ય બાબતમાં 5 જેટલા લોકોએ જાહેરમાં લાકડીના ફટકા માર્યા હતા. આ સમગ્ર ઘટનાનો વિડિયો સોશ્યલ મિડિયામાં વાયરલ થતાં મકરપુરા પોલીસે કાર્યવાહી હાથ ધરી છે.

મળતી માહિતી અનુસાર, વડોદરા શહેરના મકરપુરા વિસ્તારમાં મરાઠીની ચાલીમાં રહેતો 23 વર્ષિય સમીર પઠાણ તેનો બકરો લઈને પસાર થઈ રહ્યો હતો. તે સમયે ત્યાંથી દ્વિચક્રી વાહન પર પસાર થઈ રહેલા પશુપાલકને વાહન ધીમે ચલાવવા જણાવ્યા બાદ થયેલી તકરારએ ઉગ્ર સ્વરૂપ ધારણ કરી લીધું હતું. બાઇક સવાર યુવાને ઝઘડા અંગેની જાણ તેના મિત્રોને કરતાં 5 જેટલા યુવાનો 2 ગાડીમાં મારક હથિયારો સાથે આવી પહોંચ્યા હતા, અને સમીર પઠાણને ઘેરીને લાકડીના ફટકા માર્યા હતા. સામાન્ય બાબતમાં હુમલાખોરોનો ભોગ બનેલા સમીર પઠાણના હુમલામાં ત્રણ દાંત પણ તૂટી ગયા હતા. હુમલામાં ઇજા પામેલા સમીરે હોસ્પિટલમાં સારવાર લીધી હતી. મકરપુરા વિસ્તારમાં જાહેર રોડ ઉપર બનેલા આ બનાવે વિસ્તારમાં ચકચાર જગાવી મૂકી હતી. અલબત્ત આ ઘટનાનો સોશ્યલ મિડીયામાં વાયરલ થયો હતો. જોકે, પોલીસ દ્વારા ફરિયાદ લેવામાં આવી ન હતી. આખરે પોલીસ ભવન ખાતે પોલીસ કમિશનરને રજૂઆત કર્યા બાદ પોલીસે ગુનો દાખલ કરી કાર્યવાહી હાથ ધરી હતી.