પ્રધાનમંત્રી મોદીએ વડોદરાની દિવ્યાંગ ચિત્રકાર દિયાને નૂતન વર્ષના અભિનંદન પાઠવતો પત્ર લખ્યો

વડોદરાની દિવ્યાંગ  ચિત્રકાર દિયા ગોસાઈ માટે આ વર્ષની દિવાળી આજીવન યાદગાર બની ગઈ છે. દિયાને પ્રધાનમંત્રી નરેન્દ્ર મોદીએ પત્ર લખીને નૂતન વર્ષની શુભેચ્છાઓ પાઠવી છે. દિયાએ વડાપ્રધાન મોદી અને સ્પેનના વડાપ્રધાન સાન્ચેઝની વડોદરા મુલાકાત વખતે તેઓને ચિત્રો અર્પણ કર્યા હતા.

ભારતના પ્રધાનમંત્રી નરેન્દ્ર મોદી અને સ્પેનના રાષ્ટ્રપતિ વડોદરા પધારી રહ્યા છે.એવું જાણીને એમ.એસ.યુનિવર્સિટીમાં ભણતી દિવ્યાંગ છાત્રાએ નરેન્દ્ર મોદી અને પેડ્રો સાન્ચેઝની છબીઓ દોરીને અને સુંદર ફ્રેમમાં મઢાવી રોડ શો પસાર થવાનો હતો ત્યાં સ્થાન લઈ લીધું હતું.

બંને પ્રધાનમંત્રીઓએ જગ્યાએથી પસાર થઈ રહ્યા હતા,ત્યારે નરેન્દ્ર મોદીની નજર ચિત્રો સાથે વ્હીલ ચેરમાં બેસેલી દિયા પર પડી.એમણે કાફલો થોભાવ્યો.સ્પેનના પ્રધાનમંત્રીને સાથે લઈ વાહનમાંથી નીચે ઉતરી દિયા પાસે આવ્યા,એની પાસેથી ચિત્રોની ભેટ સ્વીકારી અને એની કળા નિપુણતાની દિલથી પ્રશંસા કરી.પ્રધાનમંત્રીએ નવી દિલ્હીની વ્યસ્તતાઓ વચ્ચે દિયાની કલાસુઝ અને કુશળતાને યાદ રાખીને પહેલી નવેમ્બર, ૨૦૨૪ના રોજ દિયાના ઘર ના સરનામે સિંહની રાષ્ટ્રમુદ્રાથી અંકિત શુભેચ્છા પત્ર પાઠવ્યો.

દિયા અને પરિવારને પહેલીવાર આવો પત્ર મળ્યો હતો.પત્રમાં તેમણે દિયાએ આપેલી મનોહર ચિત્રભેટને અવર્ણનીય આનંદ આપનારી ગણાવી છે.સ્પેનના રાષ્ટ્રપતિ ચિત્રભેટ થી ખૂબ ખુશ થયા એનો ઉલ્લેખ કર્યો છે. દિયાએ આ ચિત્ર નથી દોર્યું પરંતુ સ્પેનના લોકો માટે આપણા દેશનો સ્નેહ અને લગાવ વ્યક્ત કર્યો છે એવી લાગણી દર્શાવી છે. દિયાની ચિત્રકળામાં એક ઉમદા કલાકારની છબી ઉભરી આવે છે એવી પ્રસંશા સાથે જણાવ્યું છે કે નાની વયે અસાધારણ પ્રતિભા અને ઈશ્વરદત્ત કૃપા અનહદ આનંદ આપે છે.

ગુજરાતનો યુવા વર્ગ અનેક ક્ષેત્રોમાં ઉત્તમ યોગદાન આપીને ગુજરાતના ઉજ્જવળ ભવિષ્યની ખાત્રી કરાવે છે એવી લાગણી, દિયાના દ્રષ્ટાંતને ટાંકીને એમણે વ્યક્ત કરી છે.  પ્રધાનમંત્રી એ વિકસિત ભારતના નિર્માણમાં આપણો યુવા વર્ગ અગ્રણી ભૂમિકા ભજવશે એવા વિશ્વાસ સાથે ભારતની વિકાસયાત્રામાં મહત્વાકાંક્ષી યુવા વર્ગને પ્રાપ્ત તકો દ્વારા દેશવાસીઓનું જીવન વધુ સુખી અને સમૃદ્ધ બનવાની ભાવના દર્શાવી છે.

બહુ મોટી વાત છે આ પત્રમાં. દેશના જન જનના ઉત્કર્ષ અને કલ્યાણની ખેવના હૃદયમાં રાખીને કર્મયોગ કરતા સાધક પ્રધાનમંત્રીએ દિયાને ખંત અને મહેનતથી સર્જન અને લલિતકલાના ક્ષેત્રોમાં પ્રદાન કરતા રહેવા પત્રમાં પ્રોત્સાહિત કરી છે.દિયાની લાગણી અને આકર્ષક ચિત્ર ભેટ માટે પત્રના અંતે ફરીથી ધન્યવાદ આપ્યા છે.