વડોદરા : પોલીસની અનોખી "પહેલ", કોઈપણ સંકોચ વિના યુવતીઓ કરી શકે છે પોલીસનો સંપર્ક...

વડોદરા શહેરમાં ચકચારી તૃષા સોલંકી હત્યા કેસ બાદ યુવતીઓ અને મહિલાઓની સુરક્ષા બાબતે સવાલ ઉભા થયા છે, ત્યારે વડોદરા પોલીસે આ અંગે મદદની પહેલ કરી છે. વડોદરા પોલીસ કમિશનર શમશેર સિંઘે જણાવ્યું હતું કે, ઘણી યુવતીઓને વ્યક્તિગત સમસ્યા અથવા લવ-અફેરમાં મુશ્કેલીઓ પડતી હોય છે, છતાં તે પોલીસનો સંપર્ક નથી કરતી. તો કોઈપણ યુવતીઓને કોઇપણ પ્રકારની તકલીફ અથવા કોઇ યુવક કે, વ્યક્તિ હેરાન પરેશાન કરતા હોય તે પોલીસની શી-ટીમના મોબાઇલ નંબર પર સંપર્ક કરી શકે છે. આ સાથે જ યુવતીઓ શી-ટીમ એપ પર પણ વિગત મોકલી શકે છે. કોઇપણ જાતના સંકોચ વગર યુવતીઓ અભયમ-181, પોલીસ કંટ્રોલ નંબર 100 તેમજ પોલીસની 'જિંદગી' હેલ્પલાઇન નંબર 7434888100 પર ફોન કરી શકે છે. જો, યુવતીએ ફરિયાદ ન આપવી હોય તો પણ વડોદરા પોલીસ દરેક સમસ્યામાં યુવતીઓની મદદ અને કાઉન્સેલિંગ કરવા તત્પર હોવાનું વડોદરા પોલીસ કમિશનરે જણાવ્યુ હતું.