પશ્ચિમ બંગાળ: છઠ્ઠા તબક્કાનું મતદાન શરૂ; હિંસાને ધ્યાનમાં રાખી સુરક્ષા કડક

પશ્ચિમ બંગાળ વિધાનસભાની છઠ્ઠા તબક્કાની ચૂંટણીમાં આજે 43 વિધાનસભા બેઠકો પર મતદાન ચાલી રહ્યું છે. એક કરોડથી વધુ મતદારો 306 ઉમેદવારોનું રાજકીય ભાવિ નક્કી કરી શકશે. કોરોના વાયરસની બીજી લહેર વચ્ચે, ચૂંટણી પંચના એક અધિકારીએ જણાવ્યું હતું કે, અગાઉના તબક્કામાં થયેલી હિંસાને ધ્યાનમાં રાખીને સુરક્ષા પગલાં કડક કરવામાં આવ્યા છે. મતદાનના ચોથા તબક્કામાં 10 એપ્રિલે કૂચ બિહારમાં પાંચ લોકોનાં મોત નીપજ્યાં હતાં.

આયોગે છઠ્ઠા તબક્કામાં કેન્દ્રીય સૈન્યની ઓછામાં ઓછી 1,071 કંપનીઓ તૈનાત કરવાનો નિર્ણય લીધો છે જેથી મુક્ત અને નિષ્પક્ષ ચૂંટણીઓ થાય. મતદાન પ્રક્રિયા દરમિયાન કોવિડને લગતા માર્ગદર્શિકાનું કડક પાલન કરવામાં આવશે. આ તબક્કામાં ઉત્તર 24 પરગણા જિલ્લાની 17 બેઠકો ઉપરાંત નાદિયા અને ઉત્તર દિનાજપુરની 9 સીટો અને પૂર્વા બર્ધમાનની આઠ બેઠકો પર મતદાન થવાનું છે.

છઠ્ઠા તબક્કાના પ્રમુખ ઉમેદવારોમાં ભાજપના રાષ્ટ્રીય ઉપાધ્યક્ષ મુકુલ રોય, તૃણમૂલ પ્રધાનો જ્યોતિપ્રિયા મલ્લિક અને ચંદ્રિમા ભટ્ટાચાર્ય અને માકપા નેતા તન્મય ભટ્ટાચાર્યનો સમાવેશ થાય છે. આ સિવાય તૃણમૂલના ઉમેદવાર તરીકે ફિલ્મ નિર્દેશક રાજ ચક્રવર્તી અને અભિનેત્રી કૌસાની મુખર્જી પણ મેદાનમાં છે. ચારે જિલ્લાના 43 વિધાનસભા મત વિસ્તારોમાં 14480 મતદાન મથકો બનાવવામાં આવ્યા છે. માનવામાં આવે છે કે આ તબક્કામાં સત્તાધારી તૃણમૂલ કોંગ્રેસ અને ભાજપ વચ્ચે મુખ્ય હરીફાઈ ચાલી રહી છે.

પશ્ચિમ બંગાળના ચૂંટણીલક્ષી રાજ્યમાં કોરોનાના નવા કેસો બેકાબૂ બની રહ્યો છે. બુધવારે 10,784 નવા કેસની પુષ્ટિ થઈ. એક દિવસમાં આવનારા આ સૌથી વધુ કેસ છે. આરોગ્ય વિભાગે કહ્યું કે 24 કલાકમાં કોરોનાથી 58 લોકોનાં મોત નીપજ્યાં. રાજ્યમાં અત્યાર સુધીમાં 6,88,956 લોકો સંક્રમિત થયા છે અને મૃત્યુઆંક 10,710 પર પહોંચી ગયો છે. મંગળવારે પશ્ચિમ બંગાળમાં કોરોના વાયરસના ચેપના 9,819 નવા કેસ નોંધાયા છે.