પાકિસ્તાનમાં 58 વર્ષનો રેકોર્ડ તૂટ્યો, સાતમા આસમાન પર પહોચી મોંઘવારી..!

પાડોશી દેશ પાકિસ્તાનની આર્થિક સ્થિતિ દિવસેને દિવસે ખરાબ થઈ રહી છે, અને તે દેશના સામાન્ય લોકોને તેનો ભોગ બનવું પડે છે. પાકિસ્તાનમાં મોંઘવારી એટલી વધી ગઈ છે કે, 58 વર્ષનો રેકોર્ડ તૂટી ગયો છે. આનાથી એવી સ્થિતિ સર્જાઈ છે કે, હવે પાકિસ્તાનમાં કંઈ સસ્તું નથી. પરિવહન, ખાદ્યપદાર્થો અને બિન-આલ્કોહોલિક પીણાં, આલ્કોહોલિક પીણાં અને તમાકુ, મનોરંજન અને સંસ્કૃતિની કિંમત લગભગ 50 ટકા વધી ગઈ છે. તે જ સમયે, તેની અસર બાકીની શ્રેણીમાં પણ જોવા મળી રહી છે.

ફેબ્રુઆરી માસમાં પાકિસ્તાનના ઈતિહાસમાં સૌથી ઝડપી દરે ભાવ વધ્યા હતા. પાકિસ્તાન બ્યુરો ઓફ સ્ટેટિસ્ટિક્સે જણાવ્યું હતું કે, ફેબ્રુઆરીમાં માસિક ફુગાવો વાર્ષિક ધોરણે વધીને 31.6% થયો છે. ડેટા દર્શાવે છે કે, ખાદ્યપદાર્થો અને પરિવહન ખર્ચે ફુગાવાને તેના સર્વોચ્ચ સ્થાને ધકેલી દીધો છે. હવે વિશ્લેષકોને ડર છે કે, ત્યાંના ઘરોએ તેમનો ખર્ચ ખૂબ જ કાળજીપૂર્વક પસંદ કરવો પડશે. પાકિસ્તાનના મીડિયા રિપોર્ટ્સ અનુસાર, અમેરિકી ડોલર સામે પાકિસ્તાની રૂપિયામાં ઐતિહાસિક ઘટાડો જોવા મળ્યો છે. તો બીજી તરફ, પાકિસ્તાનમાં સોનાના પ્રતિ તોલાના ભાવમાં 4.77 ટકાનો વધારો થયો છે. આ રીતે, સોના (24 કેરેટ)ની કિંમત 9,400 રૂપિયા પ્રતિ તોલા અને 8,058 રૂપિયા પ્રતિ 10 ગ્રામ વધીને અનુક્રમે 206,500 રૂપિયા અને 177,040 રૂપિયા થઈ ગઈ છે.