અમેરિકાના સિએટલમાં સામાજિક કાર્યક્રમ દરમિયાન ફાયરિંગ, પાંચ લોકો ઘાયલ..!
અમેરિકાના સિએટલમાં એક કાર્યક્રમ દરમિયાન ફાયરિંગ થયું હતું. આ ઘટનામાં પાંચ લોકો ઘાયલ થયા છે જેમાંથી બેની હાલત ગંભીર જણાવવામાં આવી રહી છે. ફાયરિંગનું કારણ હજુ સુધી જાણી શકાયું નથી. પોલીસ આ કેસની તપાસ કરી રહી છે. સિએટલ પોલીસે જણાવ્યું હતું કે આ ઘટના શુક્રવારે રાત્રે 9 વાગ્યે બની હતી જ્યારે સિએટલમાં રેનિયલ એવન્યુ સાઉથ પરના પાર્કિંગમાં ગોળીબાર કરવામાં આવ્યો હતો.
પોલીસે જણાવ્યું કે પાર્કિંગમાં એક સામુદાયિક કાર્યક્રમનું આયોજન કરવામાં આવ્યું હતું, જેમાં લોકો જરૂરિયાતમંદોને ભોજન, કપડાં અને રમકડાં વગેરેનું વિતરણ કરી રહ્યા હતા. આ દરમિયાન લોકો પર હુમલો કરવામાં આવ્યો હતો. પોલીસનું કહેવું છે કે હુમલાનું કારણ હજુ સ્પષ્ટ થયું નથી. ગોળીબારમાં સંડોવાયેલા હોવાની શંકાના આધારે પોલીસ બે શકમંદોને શોધી રહી છે. સિએટલના પોલીસ વડા એડ્રિયન ડિયાઝે જણાવ્યું હતું કે ઘાયલો પૈકી બેની હાલત ગંભીર છે. ચાર ઘાયલોને હાર્બરવ્યુ મેડિકલ સેન્ટરમાં દાખલ કરવામાં આવ્યા છે જ્યારે એક ઘાયલને સ્થળ પર સારવાર આપવામાં આવી હતી.
