ઓસ્ટ્રેલિયાના વડા પ્રધાન એન્થોની અલ્બેનીઝે ઇઝરાયલને મોટો ઝટકો આપ્યો છે. અલ્બેનીઝે સોમવારે કહ્યું હતું કે તેમનો દેશ પેલેસ્ટાઇનને એક રાષ્ટ્ર તરીકે માન્યતા આપશે.

આ સાથે, તેઓ ફ્રાન્સ, બ્રિટન અને કેનેડાના નેતાઓની હરોળમાં જોડાયા છે, જેમણે સંકેત આપ્યો છે કે તેઓ પણ આવું જ કરશે. 

તેમની ટિપ્પણી એવા સમયે આવી છે જ્યારે તેમના મંત્રીમંડળ અને ઓસ્ટ્રેલિયાના ઘણા ભાગોમાંથી પેલેસ્ટાઇનને માન્યતા આપવા માટે અપીલ કરવામાં આવી રહી હતી, તેમજ ગાઝામાં લોકોના દુઃખ અને ભૂખમરાની વધતી ટીકાઓ પણ થઈ રહી હતી.

ઓસ્ટ્રેલિયાની સરકારે તાજેતરના દિવસોમાં ઇઝરાયલી નેતા બેન્જામિન નેતન્યાહૂની ગાઝામાં નવી અને વ્યાપક લશ્કરી કાર્યવાહીની જાહેરાત કરવાની યોજનાની પણ ટીકા કરી છે.

સોમવારે કેબિનેટની બેઠક બાદ અલ્બેનીઝે પત્રકારોને જણાવ્યું હતું કે ઓસ્ટ્રેલિયાના પેલેસ્ટાઇનને માન્યતા આપવાના નિર્ણયની ઔપચારિક જાહેરાત સપ્ટેમ્બરમાં સંયુક્ત રાષ્ટ્ર મહાસભામાં કરવામાં આવશે.

ઓસ્ટ્રેલિયાના વડા પ્રધાને કહ્યું કે આ માન્યતા "પેલેસ્ટિનિયન ઓથોરિટી તરફથી મળેલા ખાતરીઓ પર આધારિત છે." આ ખાતરીઓમાં પેલેસ્ટિનિયન સરકારમાં હમાસની કોઈ ભૂમિકા નહીં, ગાઝાનું નિઃશસ્ત્રીકરણ અને ચૂંટણી યોજવાનો સમાવેશ થાય છે.

અલ્બાનીઝે કહ્યું, "પશ્ચિમ એશિયામાં હિંસાના ચક્રને તોડવા અને ગાઝામાં સંઘર્ષ, દુઃખ અને ભૂખમરાનો અંત લાવવા માટે બે રાષ્ટ્રોનો ઉકેલ માનવતાની શ્રેષ્ઠ આશા છે." દરમિયાન, અહીં એ પણ કહેવું જોઈએ કે ઇઝરાયલ અને હમાસ વચ્ચેના યુદ્ધમાં હજારો લોકો પહેલાથી જ મૃત્યુ પામ્યા છે.

ગાઝાનો મોટો ભાગ નાશ પામ્યો છે અને અહીંના લોકોને મૂળભૂત સુવિધાઓ પણ મળી શકતી નથી. યુદ્ધ વચ્ચે ઇઝરાયલે એક મોટો નિર્ણય લીધો છે. વડા પ્રધાન બેન્જામિન નેતન્યાહૂના કાર્યાલયે કહ્યું છે કે ઇઝરાયલની સુરક્ષા કેબિનેટે ગાઝા શહેર કબજે કરવાની યોજનાને મંજૂરી આપી દીધી છે.

 Australian PM | Anthony Albanese | Israel | big announcement | Palestine