રશિયાના ડ્રોન અને મિસાઇલ હુમલાથી કિવ ફરી હચમચી ગયું, ઓછામાં ઓછા 6 લોકોના મોત

રશિયાએ બુધવારે રાત્રે યુક્રેનની રાજધાની કિવ પર મિસાઇલો અને ડ્રોનથી ઘાતક હુમલો કર્યો. આ હુમલામાં ઓછામાં ઓછા 6 લોકો માર્યા ગયા, જેમાં 6 વર્ષનો બાળક પણ સામેલ છે. યુક્રેનિયન અધિકારીઓએ ગુરુવારે આ માહિતી આપી. કિવ સિટી મિલિટરી એડમિનિસ્ટ્રેશનના વડા તૈમૂર ટાકાચેન્કોએ જણાવ્યું હતું કે ઓછામાં ઓછા 52 લોકો ઘાયલ થયા છે અને આ સંખ્યા વધી શકે છે.

તૈમૂર ટાકાચેન્કોએ જણાવ્યું હતું કે હુમલામાં નવ માળની રહેણાંક ઇમારતનો મોટો ભાગ ધરાશાયી થયો છે. રાહત અને બચાવ ટીમો ઘટનાસ્થળે પહોંચી ગઈ છે અને કાટમાળ નીચે ફસાયેલા લોકોને બચાવવાનો પ્રયાસ કરી રહી છે. યુક્રેનિયન રાષ્ટ્રપતિ વોલોડીમીર ઝેલેન્સકીએ તેમની સત્તાવાર ટેલિગ્રામ ચેનલ પર લખ્યું છે, "મિસાઇલ હુમલો. સીધો રહેણાંક ઇમારત પર. લોકો કાટમાળ નીચે દટાયેલા છે. બધી સેવાઓ સ્થળ પર છે."

ટાકાચેન્કોના જણાવ્યા અનુસાર, રશિયાએ આ હુમલામાં કિવમાં ઓછામાં ઓછા 27 સ્થળોને નિશાન બનાવ્યા હતા, જેમાં સૌથી વધુ નુકસાન સોલોમિઆન્સ્કી અને સ્વિયાટોશિન્સ્કી જિલ્લામાં થયું હતું. ઘટનાસ્થળની તસવીરોમાં આંશિક રીતે ક્ષતિગ્રસ્ત ઇમારતમાંથી ધુમાડો નીકળતો અને ચારે બાજુ કાટમાળ ફેલાયેલો જોવા મળ્યો.

રશિયાએ યુક્રેન પર આ હુમલો એવા સમયે કર્યો છે જ્યારે યુએસ પ્રમુખ ડોનાલ્ડ ટ્રમ્પે મંગળવારે કહ્યું હતું કે તેઓ રશિયન રાષ્ટ્રપતિ વ્લાદિમીર પુતિનને શાંતિ પ્રયાસોમાં પ્રગતિ કરવા માટે 8 ઓગસ્ટ સુધીનો વધુ સમય આપી રહ્યા છે. જો તેઓ ત્યાં સુધીમાં યુદ્ધવિરામનો નિર્ણય નહીં લે તો યુએસ કડક પ્રતિબંધો અને ટેરિફ લાદશે. પશ્ચિમી નેતાઓએ પુતિન પર ઇરાદાપૂર્વક યુએસની આગેવાની હેઠળની શાંતિ વાટાઘાટોમાં વિલંબ કરવાનો આરોપ લગાવ્યો છે જેથી તેઓ યુક્રેનના વધુ ભાગો કબજે કરી શકે.