વડાપ્રધાન મોદીનું વતન વડનગર દિવાળી પહેલા ડિજિટલાઇઝ થશે

વડાપ્રધાન નરેન્દ્ર મોદીની જન્મભૂમિ વડનગરને રાજ્યના પહેલા ડિજિટલ તાલુકા તરીકે વિકસાવવાનું સીએમ વિજય રૂપાણી સરકારે નક્કી કર્યું છે. કેન્દ્રના મિશન મોડ - ડિજિ - ગામ પ્રોજેક્ટ હેઠળની આ યોજના દેશમાં સૌથી પહેલી ગુજરાતમાં સાકાર કરવા રાજ્યના પંચાયત વિભાગના સંકલનમાં વિજ્ઞાન પ્રૌધોગિક શિક્ષણ આરોગ્ય જેવા વિભાગો ઝડપી કવાયત કરી રહ્યા છે.

વડનગર તાલુકાના તમામ 43 ગામોમાં આ પ્રોજેક્ટ હેઠળ ટેલી - મેડિસિન સેવા દ્રારા સુપર સ્પેશિયાલિટી આરોગ્ય સુવિધા ટેલી,એગ્રિ સપોર્ટ સેવા દ્રારા કૃષિવિષયક તમામ જાણકારી સહાય તથા ટેલી એજ્યુકેશન સેવા દ્રારા વિધાર્થીઓને કેન્દ્રીય વિધાલયોના શિક્ષકોનું ટ્યુશન ઉપલબ્ધ કરાશે,જયારે સ્કિલ સેન્ટર દ્રારા સ્થાનિક રોજગારી માટે ઔધોગિક એકમો સાથે લિંક અપ ગોઠવાશે,તદુંપરાંત પ્રત્યેક ગામમાં સોલાર ઉર્જા ઉત્પાદન માટે પેનલો ગોઠવાશે અને 56 ઈંચનું એલઇડી ટીવી જાહેર જનતા માટે મુકવામાં આવશે.

અત્યારે રાજ્યની તમામ ગ્રામ પંચાયતોમાં વી સેટના માધ્યમથી ઇન્ટરનેટ - કોમ્પ્યુટર સેવા ઉપલબ્ધ છે, એટલે આ નેટવર્કથી ડિજિ - ગામની નવી યોજના કદાચ દેશમાં સૌ પ્રથમ ગુજરાત ખાતે સાકાર થશે,બાદમાં નેશનલ ઓપ્ટિકલ ફાઈબર નેટવર્કમાં ઉપયોગ આ પ્રોજેક્ટમાં થશે,દિવાળી પહેલા આ પ્રોજેક્ટ પાર પાડવાનું નક્કી થયું હોવાનું જણાવાઈ રહ્યું છે.