સરકારના આ પગલાથી પોલિસી લેનારાઓની સંખ્યામાં વધારો

કેન્દ્ર સરકારે સુકન્યા સમૃદ્ધિ યોજનામાં વર્ષે લઘુતમ જમા કરવાની રકમની મર્યાદા Rs ૧૦૦૦થી ઘટાડીને Rs ૨૫૦ કરવામાં આવી છે. સરકારના આ પગલાથી પોલિસી લેનારાઓની સંખ્યામાં વધારો થઈ શકે છે. ગર્લ ચાઈલ્ડના નામ પર આ સેવિંગ સ્કીમને મોદી સરકારના કાર્યકાળમાં શરૂ કરવામાં આવી છે. સરકારે સુકન્યા સમૃદ્ધિ એકાઉન્ટ રૂલ્સ, ૨૦૧૬માં સંશોધન કરી દીધું છે, તેના પ્રમાણે હવે Rs ૨૫૦ વર્ષે જમા કરીને પણ પોલિસી લઈ શકાય છે.

અગાઉ ૨૦૧૮-૧૯નું બજેટ રજૂ કરતા નાણા મંત્રી અરૂણ જેટલીએ કહ્યું હતું કે આ સ્કીમ મોદી સરકારની મોટી સફળતાઓમાંની એક છે. જેટલીએ બજેટમાં કહ્યું હતું કે નવેમ્બર ૨૦૧૭ સુધી આ સ્કીમ અંતર્ગત ૧.૨૬ કરોડ એકાઉન્ટ ખોલાવવામાં આવ્યા છે અને તેમાં ૧૯૧૮૩ કરોડ રૂપિયા જમા થયા છે. પીપીએફ તેમજ અન્ય નાની બચત યોજનાઓની જેમ આ સ્કીમનો વ્યાજ દર પણ ત્રિમાસિક આધારે નક્કી થાય છે.

જુલાઈ-સપ્ટેમ્બર ક્વાર્ટર માટે આ સ્કીમનો વ્યાજ દર ૮.૧ ટકા નક્કી કરવામાં આવ્યો છે. સ્કીમ અનુસાર ગર્લ ચાઈલ્ડની વય ૧૦ વર્ષ થાય ત્યાં સુધી તેના કાયદાકીય વાલી કે માતાપિતા તેના નામ પર એકાઉન્ટ ખોલાવી શકે છે. સરકારના નોટિફિકેશન પ્રમાણે, સુકન્યા સમૃદ્ધિ યોજના અંતર્ગત કોઈપણ પોસ્ટ ઓફિસ બ્રાન્ચ અને સરકારી બેન્કમાં એકાઉન્ટ ખોલાવી શકાય છે.