અમદાવાદ : ભાજપના મહિલા કોર્પોરેટરનો તમાશો, વેકસીનેશન સેન્ટર પર ઉજવ્યો જન્મદિવસ

કોરોનાની બીજી લહેરમાં સર્જાયેલી અવ્યવસ્થાના કારણે સરકારની છબી ખરડાઇ છે તો પણ ભાજપના કાર્યકરો સુધરવાનું નામ લઇ રહયાં નથી. અમદાવાદમાં ભાજપના મહિલા કોર્પોરેટરે વેકસીનેશન સેન્ટર પર કેક કાપી પોતાના જન્મદિવસની ઉજવણી કરી હતી. ઉજવણીનો વિડીયો વાયરલ થયાં બાદ સોશિયલ મિડીયામાં કોર્પોરેટર ભારે ટ્રોલ થઇ રહયાં છે.

રાજયમાં કોરોનાના કેસ ભલે ઘટયાં હોય પણ હજી ખતરો ટળ્યો નથી. રાજય સરકાર કોરોનાની બીજી લહેરમાં ખરડાયેલી છબીને સુધારવા માટે તનતોડ મહેનત કરી રહી છે પણ ભાજપના જ કેટલાક આગેવાનો સરકારની મહેનત પર પાણી ફેરવી રહયાં છે. શહેરના એક વેક્સીન સેન્ટર પર મનપાના એક ભાજપના કોર્પોરેટરે જન્મદિવસની ઉજવણી કરી હોવાનો વિડીયો વાયરલ થયો છે. કોરોનાની સંભવિત ત્રીજી લહેર પહેલાં લોકો વેકસીન મુકાવવા માટે દોડધામ કરી રહયાં છે. કલાકો સુધી લાઇનમાં ઉભા રહયાં બાદ વેકસીન માટે નંબર લાગે છે.

આવામાં ભાજપના કોર્પોરેટર દિપ્તી અમરકોટીયાને વેકસીનેશન સેન્ટર પર કેક કાપી જન્મદિવસની ઉજવણીનો અભરખો જાગ્યો હતો. લોકોને પડતી હાલાકીની જાણે પડી ન હોય તેમ કોર્પોરેટરે વેકસીનેશન સેન્ટર પર કેક કાપી પાર્ટીની આબરૂના ધજાગરા ઉડાવી દીધાં છે. જન્મદિવસની ઉજવણી દરમિયાન માસ્ક અને સોશિયલ ડિસ્ટન્સિંગના નિયમોના પણ ધજાગરા ઉડતા જોવા મળ્યા હતાં. સામાન્ય નાગરિકોને આડેધડ દંડ ફટકારતી રાજય સરકાર તેમની જ પાર્ટીના નગરસેવિકા સામે શું પગલાં ભરે છે તે જોવું રહયું..