આવતીકાલે અમિત શાહ અમદાવાદના ધારાસભ્ય સાથે બેઠક કરશે, CM ભુપેન્દ્ર પટેલ પણ રહેશે હાજર

કેન્દ્રીય ગૃહમંત્રી અમિત શાહ વધુ એક વખત ગુજરાતની મુલાકાતે આવી રહ્યાં છે. ગૃહમંત્રી અમિત શાહ આવતીકાલે ગુજરાત આવશે. જ્યાં તેઓ પોતાના મત વિસ્તારના ધારાસભ્ય સાથે બેઠક કરશે. અમિત શાહની આ બેઠકમાં મુખ્યમંત્રી ભૂપેન્દ્ર પટેલ પણ હાજર રહેશે.

ગૃહમંત્રી અમિત શાહ અને ભૂપેન્દ્ર પટેલ અમદાવાદના ઘાટલોડિયા, સાબરમતી અને નારણપુરાના ધારાસભ્યો સાથે બેઠક કરશે. તદુપરાંત આ બેઠકમાં સાણંદ, વેજલપુર, કલોલ અને ગાંધીનગર ઉત્તરના ધારાસભ્ય પણ હાજર રહેશે. આ બેઠકમાં વિકાસના કાર્યો તેમજ લોકોના પ્રશ્નોની ચર્ચા કરશે. શહેરના સાબરમતી સ્પોર્ટ્સ કોમ્પલેક્ષ તેમજ નવા રેલ્વે સ્ટેશન અંગે પણ બેઠકમાં ચર્ચા કરાશે ઉલ્લેખનીય છે કે, હજુ તો ગઇકાલે જ અમિત શાહે અમદાવાદ ઓગણજ ખાતે પ્રમુખસ્વામી મહારાજ શતાબ્દી મહોત્સવની મુલાકાત લીધી હતી. અમિત શાહે મહોત્સવની મુલાકાત લઈ સંતોના આશીર્વાદ લીધા હતા. અત્રે નોંધનીય છે કે, તાજેતરમાં જ ગુજરાત વિધાનસભાની ચૂંટણીના પરિણામો જાહેર થઇ ગયા છે. જેમાં ભાજપે એક રેકોર્ડ બનાવ્યો છે. ગુજરાતમાં ભાજપે 156 સીટ પર વિજય હાંસલ કરી માધવસિંહ સોલંકીનો રેકોર્ડ તોડી નાખ્યો છે.