અંકલેશ્વર : જુના દીવા ગામે નિ:શુલ્ક મેડિકલ કેમ્પ યોજાયો, 250થી વધુ લોકોએ આંખની તપાસ કરાવી...

ભરૂચ જિલ્લાના અંકલેશ્વરની શ્રીમતી જયાબેન મોદી હોસ્પિટલ તેમજ એશિયન પેઈન્ટ કંપનીના સંયુક્ત સહયોગથી જુના દીવા ગામ ખાતે આંખના દર્દીઓ માટે નિ:શુલ્ક મેડિકલ કેમ્પ યોજાયો હતો.

અંકલેશ્વર ઇન્ડસ્ટ્રીયલ ડેવલોપમેન્ટ સોસાયટી સંચાલિત શ્રીમતી જયાબેન મોદી મલ્ટી સ્પેશિયાલિટી હોસ્પિટલ તેમજ એશિયન પેઈન્ટ કંપનીના સંયુક્ત ઉપક્રમે જુના દીવા ગામ ખાતે આંખના દર્દીઓ માટે નિ:શુલ્ક મેડિકલ કેમ્પ યોજાયો હતો. જેમાં જરૂરિયાતમંદ દર્દીઓને આંખની તપાસ કરી દવા આપવામાં આવી હતી. આ સાથે જ મોતિયાની સર્જરી પણ શ્રીમતી જયાબેન મોદી હોસ્પિટલમાં કરવામાં આવશે. આ કેમ્પમાં જુના દીવા ગામ, જૂની દીવી, જુના બોરભાઠા સહિત આજુબાજુના ગામના લોકોએ આંખની તપાસ કરાવી હતી. આ કેમ્પમાં 250થી વધુ લોકોએ આંખની તપાસ કરાવી હતી. આ કેમ્પમાં મોતિયા વેલ, છારી જામી જવી, આંખ લાલ થઈ જવી, ઝાંખુ દેખાવવું, માથાનો દુખાવો, આંખમાંથી પાણી નીકળવું, આંખમાં ખંજવાળ આવવી સહિતની આંખની તકલીફોની તપાસ કરવામાં આવી હતી. નિ:શુલ્ક મેડિકલ કેમ્પમાં શ્રીમતી જયાબેન મોદી હોસ્પિટલમાંથી આંખના નિષ્ણાંત ડો. રંજના ચૌહાણ તેમજ ઓપ્ટિમેટ્રિક મહેશ પટેલ, નિધિ સાવલિયા દ્વારા સેવા આપવામાં આવી હતી.