હવે ભરૂચમાં થશે કષ્ટભંજન હનુમાનજીના દર્શન, પ્રાણપ્રતિષ્ઠા મહોત્સવની તૈયારીઓને અંતિમ ઓપ...

ભરૂચ શહેરના કબીરપુરા ખત્રીવાડ વિસ્તારમાં કષ્ટભંજન હનુમાનજી મંદિરના પ્રાણપ્રતિષ્ઠા મહોત્સવની તડામાર તૈયારીઓ ચાલી રહી છે, ત્યારે સાળંગપુર સહિત વિવિધ જિલ્લાઓના સંતો-મહંતોની ઉપસ્થિતિમાં આ પ્રાણપ્રતિષ્ઠા મહોત્સવને ભક્તિભાવ સાથે સંપન્ન કરવાનું આયોજન કરાયું છે.

ભરૂચ શહેરના ધોળીકુઈ બજાર નજીક કબીરપુરા ખત્રીવાડ વિસ્તારમાં હનુમાનજીના મંદિરનો જીર્ણોદ્ધાર કરવામાં આવ્યો છે. આ મંદિરમાં સાળંગપુરના કષ્ટભંજન હનુમાનજી મંદિરમાં સ્થાપિત હનુમાનજીની આબેહૂબ પ્રતિમાના દર્શન હવે ભરૂચમાં ભક્તોને થશે, ત્યારે આ મંદિરમાં પ્રાણપ્રતિષ્ઠા મહોત્સવમાં વિવિધ ધાર્મિક કાર્યક્રમો પણ યોજાશે. ભરૂચમાં સ્થાપિત કષ્ટભંજન હનુમાનજીની પ્રતિમા બનાવવા માટે મૂર્તિકારોને 3 વર્ષ જેટલો સમય લાગ્યો છે. જેથી આ પ્રતિમા ભક્તોમાં પણ આકર્ષણનું કેન્દ્ર બની રહી છે. ભરૂચમાં કષ્ટભંજન હનુમાનજીની પ્રતિમાની પ્રાણપ્રતિષ્ઠા મહોત્સવમાં સાળંગપુરના પૂજારી રવિશંકર મહારાજ, સભા સંચાલક શાસ્ત્રી સૂર્યપ્રકાશ સ્વામી સહિત અનિલ મહારાજ સહિત વિવિધ જિલ્લાઓના સંતો-મહંતોની ઉપસ્થિતિમાં 5 દિવસ દરમ્યાન આ પ્રાણપ્રતિષ્ઠા મહોત્સવને ભક્તિભાવ માહોલમાં સંપન્ન કરવાનું આયોજન કરાયું છે.

તારીખ ૧/૦૬/૨૦૨૨ના રોજ સવારે ૮.૦૦ કલાકે મારૂતિ યજ્ઞ તથા બપોરે ૩.૩૦ કલાકે કસક જલારામ મંદિરથી કષ્ટભંજન હનુમાનજી મંદિર સુધી ભવ્ય શોભાયાત્રા નીકળશે. સાંજે ૪:૩૦ કલાકે જલાઘિવાસ ત્યારબાદ સાંજે પથી ૭:૩૦ કલાક સુધી કથા પ્રારંભ કરવામાં આવનાર છે. તો બીજા દિવસે એટલે કે, તારીખ ૨/૬/૨૦૨૨ને ગુરુવારના રોજ સવારે ૧૦:૩૦ કલાકે મૂર્તિ પ્રાણપ્રતિષ્ઠા, ૧૨:૦૦ કલાકે અન્નકૂટ આરતી અને યજ્ઞની પુર્ણાહુતી, બપોરે ૪:૦૦થી ૬:૩૦ સુધી કથા તથા સાંજે મહાપ્રસાદીનું આયોજન કરવામાં આવ્યું છે. આ સાથે જ સતત ત્રીજા દિવસે પણ કથાનું ભવ્ય આયોજન કરવામાં આવ્યું છે.