ગુજરાત નાણા વિભાગમાં 426 સરકારી જગ્યાઓની ભરતી, 17 નવેમ્બરથી ફોર્મ શરૂ

ગુજરાતમાં સરકારી નોકરીની તૈયારી કરતા યુવાઓ માટે નાણા વિભાગ તરફથી એક અત્યંત મહત્વપૂર્ણ જાહેરાત કરવામાં આવી છે, જેમાં કુલ 426 જગ્યાઓ માટે નવી ભરતી પ્રક્રિયા શરુ થવાની છે.

રાજ્યના નાણાં વિભાગના નિયંત્રણ હેઠળ પેટા હિસાબનીશ/સબ ઓડીટર વર્ગ–3ની 321 જગ્યાઓ તથા હિસાબનીશ ઓડીટર/પેટા તિજોરી અધિકારી/અધિક્ષક વર્ગ–3ની 105 જગ્યાઓ ભરવામાં આવશે. આ બંને પદો માટે ઓનલાઈન અરજી પ્રક્રિયા 17 નવેમ્બર 2025થી શરૂ થશે અને 30 નવેમ્બર 2025 સુધી ચાલુ રહેશે. સરકારી ક્ષેત્રમાં સ્થિર અને ઉત્તમ વેતન સાથેની નોકરી મેળવવા માગતા ઉમેદવારો માટે આ ભરતી એક સોનેરી તક માનવામાં આવી રહી છે.

જાહેર થયેલી આ જગ્યાઓમાં રિઝર્વેશનનું વિતરણ પણ વિગતવાર જાહેર કરવામાં આવ્યું છે. પેટા હિસાબનીશ/સબ ઓડીટર વર્ગ 3ની 321 જગ્યાઓમાંથી આર્થિક રીતે નબળા વર્ગ (EWS) માટે 42, OBC માટે 108, SC માટે 22 અને ST માટે 82 જગ્યાઓ અનામત રાખવામાં આવી છે. બીજી તરફ, પેટા તિજોરી અધિકારી/અધિક્ષક વર્ગ 3ની 105 જગ્યાઓમાં EWS માટે 14, OBC માટે 36, SC માટે 11 અને ST માટે 21 સીટનો સમાવેશ થાય છે. કુલ મળીને 426 જગ્યાઓ માટે ઉમેદવારોને તક મળશે, જેને કારણે રાજ્યભરમાં નોકરીની તૈયારી કરતા યુવાનોમાં ઉત્સાહનો માહોલ સર્જાયો છે.

ભરતીની વય મર્યાદા અંગે પણ મહત્વપૂર્ણ માર્ગદર્શિકા જાહેર કરવામાં આવી છે. 30 નવેમ્બર 2025 સુધી ઉમેદવારની ઉંમર 20 થી 35 વર્ષની વચ્ચે હોવી ફરજિયાત છે. અનામત કેટેગરીઓ માટે વય મર્યાદામાં વિશેષ છૂટછાટ પૂરતી આપવામાં આવી છે, જેમાં SC/ST, OBC તેમજ દિવ્યાંગ મહિલા ઉમેદવારોનો સમાવેશ થાય છે. આ છૂટછાટ 5 થી 20 વર્ષ સુધીની હોઈ શકે છે, જેનાથી વધુ લોકો આ ભરતી પ્રક્રિયામાં ભાગ લઈ શકશે.

પગારધોરણની વાત કરીએ તો બંને પદો પર પસંદ થયેલા ઉમેદવારોને શરૂઆતના પાંચ વર્ષ માટે ફિક્સ પગાર આપવામાં આવશે. પેટા હિસાબનીશ/સબ ઓડીટર પદે 26,000 રૂપિયાનું માસિક વેતન નક્કી કરાયું છે, જ્યારે કાયમી થયા બાદ વેતન ₹81,000 સુધી પહોંચી શકે છે. પેટા તિજોરી અધિકારી/અધિક્ષક પદે શરૂઆતમાં ₹49,600 વેતન અને કાયમી થયા બાદ વેતન ₹1,26,600 સુધી રહેવાની શક્યતા જાહેર કરવામાં આવી છે. આ વેતનધોરણ યુવાનો માટે અત્યંત આકર્ષક છે અને સરકારી નોકરીની સ્થિરતા સાથે જોડાયેલી સુરક્ષા પણ આપવામાં આવે છે.

આ ભરતી પ્રક્રિયા બે તબક્કામાં પૂર્ણ થશે. પ્રથમ તબક્કામાં પ્રિલિમિનરી પરીક્ષા લેવામાં આવશે, જેમાં MCQ પ્રકારના પ્રશ્નો હશે અને 150 ગુણનું પેપર 2 કલાકમાં પૂર્ણ કરવાનું રહેશે. પ્રિલીમમાં સફળ ઉમેદવારોને મુખ્ય પરીક્ષા (Main Exam) માટે બોલાવવામાં આવશે, જેમાં બે પેપર 100–100 ગુણના હશે. મુખ્ય પરીક્ષા પાસ કર્યા બાદ ઉમેદવારોના ડોક્યુમેન્ટ વેરીફિકેશન અને મેડિકલ ટેસ્ટ થશે. અંતે તમામ તબક્કાઓ સફળતાપૂર્વક પાર કરનાર ઉમેદવારોની અંતિમ પસંદગી કરવામાં આવશે.

શૈક્ષણિક લાયકાત મુજબ ઉમેદવારોએ કોઈ માન્ય યુનિવર્સિટીમાંથી BBA, BCA, BCom, BSc (Mathematics/Statistics), અથવા BA (Economics/Statistics/Mathematics) પૂર્ણ કર્યું હોવું જોઈએ. ખાસ નોંધનીય છે કે B.Sc. (CA & IT) અને M.Sc. (CA & IT) ધરાવતા ઉમેદવારો આ ભરતી માટે લાયક ગણાશે નહીં. ઉપરાંત કોમ્પ્યુટરનું મૂળભૂત જ્ઞાન ફરજીયાત છે, જેનાથી ઉમેદવારોને ઓફિસ કાર્યક્ષમતા માટે જરૂરી ટેકનિકલ કુશળતા મળે.