આમિર ખાન દિલ્હીમાં રાષ્ટ્રપતિ દ્રૌપદી મુર્મુને મળ્યા હતા. આ મુલાકાત બુધવારે દિલ્હીના રાષ્ટ્રપતિ ભવનમાં થઈ હતી, જ્યાં આમિરે તેમની તાજેતરમાં રિલીઝ થયેલી ફિલ્મ 'સિતારે જમીન પર'નું સ્પેશિયલ સ્ક્રીનિંગનું આયોજન કર્યું હતું.

આ દરમિયાન ફિલ્મની આખી કાસ્ટ હાજર હતી. આ અંગે માહિતી આપતાં, ભારતના રાષ્ટ્રપતિના સત્તાવાર X પ્લેટફોર્મ પરથી સ્પેશિયલ સ્ક્રીનિંગની તસવીરો શેર કરવામાં આવી છે. પોસ્ટમાં આમિર ખાન અને રાષ્ટ્રપતિ દ્રૌપદી મુર્મુની તસવીર જોવા મળે છે.

બીજી પોસ્ટમાં લખ્યું છે કે- રાષ્ટ્રપતિ દ્રૌપદી મુર્મુએ રાષ્ટ્રપતિ ભવનના સાંસ્કૃતિક કેન્દ્રમાં 'સિતારે જમીન પર' જોયું હતું. આ ફિલ્મમાં રિયલ ન્યુરોડાયવર્જન્ટ પરિસ્થિતિઓથી પીડાતા લોકોને બતાવવામાં આવ્યા છે, જે વિવિધતા, સમાનતા અને સમાવેશનો સંદેશ આપે છે. આ દરમિયાન ફિલ્મના નિર્માતા અને મુખ્ય એક્ટર આમિર ખાન અને ફિલ્મની ટીમ પણ હાજર હતી.

આમિર ખાનના પ્રોડક્શન હાઉસની ફિલ્મ 'સિતારે જમીન પર' 20 જૂને રિલીઝ થઈ છે. આમિર ખાન અને જેનેલિયા ડિસોઝા ઉપરાંત, આ ફિલ્મમાં ડાઉન સિન્ડ્રોમથી પીડિત બાળકો પણ મહત્વપૂર્ણ ભૂમિકાઓમાં છે. આ ફિલ્મ એક બાસ્કેટબોલ કોચ પર આધારિત છે જે આ બાળકોનો કોચ બને છે.