સુરેન્દ્રનગર : શિયાણી ગામની વિદ્યાર્થિનીએ અનોખી સાયકલ બનાવી, પેટ્રોલ-ડિઝલની બચત સાથે વાતાવરણ રહેશે પ્રદૂષણમુક્ત...

• લીંબડી તાલુકાના શિયાણી ગામની વિદ્યાર્થિનીની સિદ્ધિ

• સરકારી શાળામાં અભ્યાસ કરતી વિદ્યાર્થીનીની પહેલ

• વિદ્યાર્થીનીએ કરી છે ઇલેક્ટ્રિક સાયકલની અનોખી શોધ

• પેટ્રોલ-ડિઝલની બચત સાથે વાતાવરણ પ્રદૂષણમુક્ત

• મધ્યમવર્ગીય લોકોનો પણ પોષાય તેવી અનોખી સાયકલ

સુરેન્દ્રનગર જિલ્લાના લીંબડી તાલુકાના શિયાણી ગામની સરકારી શાળામાં અભ્યાસ કરતી વિદ્યાર્થીનીએ ઇલેક્ટ્રિક સાયકલની અનોખી શોધ કરી છે. જેનાથી પેટ્રોલ-ડિઝલની બચત સાથે વાતાવરણને પ્રદૂષિત થતું અટકાવી શકાય છે અને ખાસ કરીને આ સાયકલ મધ્યમવર્ગીય લોકોનો પણ પોષાય તેમ છે.

સુરેન્દ્રનગર જિલ્લાના લીંબડી તાલુકાના શિયાણી ગામે કન્યા પ્રાથમિક શાળામાં ધોરણ ૮માં અભ્યાસ કરતી વિદ્યાર્થીનીએ ઇન્સ્પાયર એવોર્ડ અંતર્ગત અનોખી ઇલેક્ટ્રિક સાયકલ બનાવતા આ સાયકલની ક્રુતિની રાજ્યકક્ષાએ પસંદગી થઇ છે. હાલ પેટ્રોલ અને ડિઝલના ભાવ આસમાનને આંબી રહ્યાં છે, જેને લઇને સ્કુટર તેમજ કાર સહીતના ઇલેક્ટ્રિક વાહનોનું ચલણ જોવા મળી રહ્યું છે. લોકોમાં પણ ઇલેક્ટ્રોનિક વાહનોની ખરીદીનો ક્રેઝ જોવા મળી રહ્યો છે. પરંતુ ઇલેક્ટ્રોનિક વાહનોની કિંમત પેટ્રોલ-ડિઝલના વાહનો કરતા વધુ જોવા મળી રહી છે.

જેથી સામાન્ય વર્ગના પરિવારો આવા વાહનો ખરીદી કરી શકતાં નથી. આથી સામાન્ય વર્ગના પરિવારો પણ ઇલેક્ટ્રોનિક વાહનનો ઉપયોગ કરી શકે તેવા ઉમદા ઉદ્દેશ સાથે વિદ્યાર્થિની વિરલબા જાદવે ઇલેક્ટ્રિક તેમજ સોલાર બન્નેના ઉપયોગથી ચાલતી અનોખી સાયકલ બનાવી છે. અંદાજે ૩થી ૪ દિવસની મહેનત બાદ આ ઇલેક્ટ્રિક સોલાર સાયકલ બનાવવામાં આવી છે. આ સાયકલની ખાસ વિશેષતા એ છે કે, આ સાયકલમાં લગાવેલ બેટરી સોલાર, ડાયનેમા અને ઇલેક્ટ્રિક એમ ત્રણ રીતે ચાર્જ થઇ શકે છે.

કેન્દ્ર સરકારના સાયન્સ અને ટેકનોલોજી વિભાગ દ્વારા દર વર્ષે ઇન્સ્પાયર એવોર્ડ માટે શાળાના વિદ્યાર્થીઓ  દ્વારા બનાવેલા ક્રુતિઓનું રજીસ્ટ્રેશન કરવામાં આવે છે, જેમાં આ ઇલેક્ટ્રિક સોલાર સાયકલની ક્રુતિ રાજ્યકક્ષાએ પસંદગી પામતા વિદ્યાર્થીનીને આ ક્રુતિ બનાવવા માટે રૂપિયા ૧૦ હજારની આર્થિક સહાય પણ આપવામાં આવી છે. આગામી વર્ષોમાં ઇલેક્ટ્રોનિક બાઇક અને કારના જમાનામાં આ ઇલેક્ટ્રિક સોલાર સાયકલ ચોક્કસ સફળ રહેશે તેવી આશા છે.