અરવલ્લી : ચાલકને ઝોંકું આવતા ખાનગી બસ પલટી મારી, 15 મુસાફરો થયા ઇજાગ્રસ્ત...

અરવલ્લી જિલ્લાના મોડાસા-શામળાજી સ્ટેટ હાઇવે પર ગાજણ ગામ નજીક ખાનગી બસના ચાલકને ઝોંકું આવી જતાં બસ પલટી મારી ગઈ હતી. જેમાં 15 જેટલા મુસાફરોને ઇજા પહોચતા સારવાર અર્થે હોસ્પિટલ ખસેડવામાં આવ્યા હતા.

મળતી માહિતી અનુસાર, રાજસ્થાનથી મુસાફરો લઈને પુના જતી ખાનગી બસ મોડાસા-શામળાજી સ્ટેટ હાઇવે પર વહેલી સવારે ગાજર નજીક પલટી મારી જતાં અકસ્માત સર્જાયો હતો. મુસાફરો ભર ઉંઘમાં હતા અને અચાનક બસ પલટી મારી જતા મુસાફરોમાં બુમરાણ મચી હતી, ત્યારે બસમાં સવાર 50 મુસાફરો પૈકી 15 જેટલા મુસાફરોને નાનીમોટી ઇજા પહોચી હતી. બનાવની જાણ થતા જ રાત્રી પેટ્રૉલિંગનો પોલીસ કાફલો તાત્કાલિક ઘટના સ્થળે દોડી આવ્યો હતો. ત્યારબાદ તમામ ઇજાગ્રસ્તોને એમ્બ્યુલન્સ મારફતે મોડાસાની સાર્વજનિક હોસ્પિટલ ખાતે સારવાર અર્થે ખસેડવામાં આવ્યા હતા. જોકે, રાજસ્થાનથી પુના જતી બસના ચાલકને ઝોંકું આવી જતાં બસ પલટી મારી ગઇ હોવાનું પોલીસ તપાસમાં બહાર આવ્યું છે.