ભરૂચ : નેત્રંગના કામલીયા ગામે દીપડાનું બચ્ચું ખાડામાં ખાબક્યું, વનકર્મીઓએ કર્યું રેસ્ક્યું...

ભરૂચ જિલ્લાના નેત્રંગ તાલુકાના કામલીયા ગામે એક દીપડો ખાડામાં ખાબક્યો હતો, ત્યારે વનકર્મીઓએ તાત્કાલીક ઘટનાસ્થળ પર દોડી જઈ રેસક્યું હાથ ધરી દીપડાને બહાર કાઢ્યો હતો. મળતી માહિતી અનુસાર, ભરૂચ જિલ્લાના નેત્રંગ તાલુકાના કામલીયા ગામમાં આવેલ ખેતરમાં કૂવાની બાજુમાં પાઇપલાઇન ઉતારવાના ખાડામાં દીપડાનું એક વર્ષીય બચ્ચું ફસાઇ જવાની જાણ ગામના સરપંચ અને રહીશોએ નેત્રંગ વન વિભાગના આરએફઓ એમ.એફ.દિવાનને કરતાં તાત્કાલિક જરૂરી સાધન-સામગ્રી સાથે ઘટના સ્થળ પર પહોંચી રેસ્ક્યુંની કામગીરી શરૂ કરી હતી, જ્યાં ભારે જહેમત ઉઠાવ્યા બાદ દીપડાને બચાવી લેવામાં આવતા રાહતનો શ્વાસ લીધો હતો.

દીપડો ખાડામાં ફસાયા હોવાની જાણ વાયુવેગે પ્રસરતા ઘટના સ્થળે લોકટોળા ઉમટી પડ્યા હતા. ઉલ્લેખનીય છે કે, ભરૂચ જીલ્લાના વાલીયા, ઝઘડીયા અને નેત્રંગ તાલુકો વન્યપ્રાણીના વસવાટ માટે જાણે અભ્યારણ બની જવા પામ્યા છે. કારણ કે, અવારનવાર દીપડાઓ માનવ વસ્તીમાં નજરે પડવા અને પાંજરે પુરવાની ઘટના પ્રકાશમાં આવતી હોય છે. પરંતુ વર્ષો પહેલા અંબાજી-ઉમરગામ સુધીના જંગલ વિસ્તારમાં વન્યપ્રાણીઓ જ વસવાટ કરી રહ્યા હતા. પરંતુ છાશવારે ગેરકાયદેસર લાકડાનું કટીંગ અને માનવ વસ્તી જંગલ વિસ્તાર ઉપર હાવી થઈ જતાં આજે પરીસ્થિતિ અલગ ઉદભવી છે.