ભરૂચ-અંકલેશ્વર શહેરી વિકાસ સત્તામંડળ બૌડાની બોર્ડ બેઠક ભરૂચ કલેક્ટર અને બૌડા ચેરમેન ગૌરાંગ મકવાણાની અધ્યક્ષતામાં યોજાઈ હતી.

ભરૂચ-અંકલેશ્વર શહેરી વિકાસ સત્તામંડળ બૌડાની મળેલી બોર્ડ બેઠકમાં નગરજનોના સુખાકારી અને ઇન્ફ્રાસ્ટ્રક્ચર સુધારવા માટે અંદાજે ₹45 કરોડના વિકાસ કામોને સૈદ્ધાંતિક મંજૂરી આપવામાં આવી હતી.બેઠકમાં જિલ્લા પંચાયતના પ્રમુખ મહેન્દ્રસિંહ વાંસદિયા, નિવાસી કલેક્ટર એન.આર.ધાંધલ સહિતના અધિકારીઓ ઉપસ્થિત રહ્યા હતા.મંજૂર થયેલા મુખ્ય પ્રોજેક્ટ્સમાં કોસમડી વિસ્તારના સુઆયોજિત વિકાસ માટે 11 નગર રચના યોજનાઓ તૈયાર કરવાની મંજૂરી આપવામાં આવી છે. આ અંતર્ગત અંદાજિત 1300 હેક્ટર વિસ્તાર માટે હદ પરામર્શ મેળવવાની કાર્યવાહી હાથ ધરાશે.ઝાડેશ્વર વિસ્તારના ડ્રાફ્ટ ટીપી હેઠળ નગર રચના અધિકારીના સૂચનો પાઠવવાની મંજૂરી પણ આપવામાં આવી છે.

આ અંતર્ગત 25.52 હેક્ટરમાં રહેણાંક, બાગ-બગીચા અને સામાજિક માળખાં સહિતના ઉપયોગ માટે જમીનો ઉપલબ્ધ કરાશે.ટી.પી. રોડ વિકાસ માટે ₹25 કરોડની મંજૂરી આપવામાં આવી છે.તળાવોના નવીનીકરણ અને બ્યુટિફિકેશન માટે ₹20 કરોડની મંજૂરી આપવામાં આવી છે. આમાં ભોલાવ, તવરા, કાપોદરા અને કોસમડી ગામના તળાવોનો સમાવેશ કરવામાં આવ્યો છે.બૌડાની નવી વેબસાઈટ ડિઝાઇન કરવાની પણ મંજૂરી આપવામાં આવી છે.આ વેબસાઈટ પર નગર રચના યોજનાઓ અને વિકાસ કામગીરીની માહિતી ઓનલાઈન ઉપલબ્ધ થશે.