• ભરૂચ શહેરમાં પવનના જોર સાથે વરસ્યો વરસાદ

• વરસાદ વરસતા કેટલાક વિસ્તારમાં ભરાયા પાણી

• વોર્ડ નં 7માં નવી વસાહતના રહીશોની હાલત બની કફોડી

• અંડર ગ્રાઉન્ડ ગટર ચોકઅપ થઈ જતા ઘરોમાં ઘુસ્યા પાણી

• નગરપાલિકાની કામગીરી સામે લોકોએ ઠાલવ્યો રોષ   

ભરૂચ શહેરમાં રાત્રે વરસેલા કમોસમી ભારે વરસાદને પગલે અનેક વિસ્તારોમાં પાણી ભરાવાની સ્થિતિ સર્જાઈ હતી. વોર્ડ નંબર 7ની નવી વસાહતમાં અંડર ગ્રાઉન્ડ ગટર ચોકઅપ થઈ જતાં ગંદા પાણી રહેણાંક મકાનોમાં ઘૂસી જતાં સ્થાનિકોમાં ભારે રોષ જોવા મળ્યો હતો.

ભરૂચ પંથકમાં રાત્રી દરમિયાનથી વરસાદી માહોલ જામ્યો છે.જેના કારણે અનેક વિસ્તારમાં વરસાદી પાણીએ જમાવટ કરી હતી,તો બીજી તરફ વોર્ડ નંબર 7માં નવી વસાહતમાં અંડર ગ્રાઉન્ડ ગટર ચોકઅપ થઈ જતા વરસાદમાં ગટરના ગંદા પાણી સ્થાનિક રહીશોના ઘરમાં ઘુસ્યા હતા.

સ્થાનિક રહેવાસીઓના જણાવ્યા મુજબ,ગટરમા વારંવાર અવરોધ સર્જાતા હોવા છતાં ભરૂચ નગરપાલિકા દ્વારા તાત્કાલિક અને અસરકારક પગલાં લેવામાં આવતા નથી. રહીશોએ અગાઉ અનેક વખત રજૂઆત કરવા છતાં ગટરની યોગ્ય સાફ સફાઈનો પ્રશ્ન યથાવત રહ્યો હોવાનું જણાવ્યું હતું.

ગતરાત્રે પડેલા વરસાદના પગલે ગટર ઓવરફ્લો થતા નાળાની માફક ઘરોમાં પાણી ઘૂસી ગયા હતા. સ્થાનિક લોકોને ભારે હાલાકીનો સામનો કરવો પડ્યો હતો.આ ઘટનાને પગલે  લોકોનો રોષ ફાટ્યો હતો અને કેટલાક રહીશોએ સ્પષ્ટ શબ્દોમાં ભાજપના કોર્પોરેટરો સામે અસંતોષ વ્યક્ત કરતા જણાવ્યું કે, "આવતા ચૂંટણીમાં કમળને મત આપતા પહેલા વિચારવું પડશે."જો કે ઘટનાની ગંભીરતાને ધ્યાનમાં લઈ પાલિકાની ટીમ સ્થળ પર પહોંચી ગટર સફાઈની કામગીરી હાથ ધરી હતી.