ભરૂચ દૂધધારા ડેરીની ગુરૂવારે મળેલી 65મી વાર્ષિક સાધારણ સભા છેલ્લા કેટલાક સમયથી ચાલતા આંતરિક રાજકારણને લઈ ઉગ્ર બની રહી હતી.

ભરૂચ ડિસ્ટ્રિક્ટ કો-ઓપરેટિવ મિલ્ક પ્રોડ્યુસર્સ યુનિયન દૂધધારા ડેરીની 65મી વાર્ષિક સાધારણ સભા ઝાડેશ્વર સ્વામિનારાયણ મંદિરના સભાખંડમાં મળી હતી.દૂધધારા ડેરીમાં છેલ્લા કેટલાક સમયથી વર્ષે 1000 કરોડનું ટર્ન ઓવર સર કરવા આગળ વધી રહેલી સંસ્થામાં ભાજપના જ નેતાઓના મલાઈદાર રસને લઈ રાજકારણ ઉથલપાથલ મચાવી રહ્યું છે. 

લોકસભાની ચૂંટણી પેહલા જ સાંસદ મનસુખ વસાવાએ નર્મદા જિલ્લા ભાજપ પ્રમુખ અને ડેરીના ચેરમેન ઘનશ્યામ પટેલ સામે તેમની નારાજગી વખતો વખત જાહેરમાં વ્યક્ત કરી હતી. સામાન્ય સભામાં ચેરમેન ઘનશ્યામ પટેલ, એમ.ડી., ડિરેક્ટરો, અન્ય સહકારી આગેવાનો, સભાસદો મોટી સંખ્યામાં જોડાયા હતા. જોકે સભાના ચેરમેનને લઈને જ પહેલો હોબાળો મચ્યો હતો. સભામાં નર્મદા ભાજપ પ્રમુખ અને ડેરીના ચેરમેન ઘનશ્યામ પટેલ વિરોધી ભાજપના જ એવા ગ્રુપે એક બાદ એક આરોપ લગાવી વિવાદો ઉભા કર્યા હતા. અને સભામાં ગરમાં ગરમી સાથે હંગામો પણ મચાવી દીધો હતો. પોલીસ બંદોબસ્ત પહેલાથી જ મેળવાયો હોય સભા તોફાની બનતા રહી ગઈ હતી.સભામાં કેટલાક સભાસદોએ ગત વર્ષે  રૂપિયા 625 કરોડનાં ટર્નઓવર સામે સભાસદોને 16 કરોડ રૂપિયાનું ચુકવણું કરવામાં આવ્યું હોવાની ફરિયાદો કરી હતી. જ્યારે આ વર્ષે રૂપિયા 995 કરોડના ટર્નઓવર સામે 21 કરોડની ફાળવણી સામે અસંતોષ સાથે ઉગ્ર બળાપો ઠાલવ્યો હતો.ભરૂચ દૂધધારા ડેરીની ચૂંટણી આવતા વર્ષે આવી રહી છે,ત્યારે એક વર્ષ પેહલા જ સંસ્થામાં રાજકારણ બરાબરનું ગરમાયુ છે.